ازيكم كلكم بلا استثناء دي اول مشاركه ليا في المنتدي مع اني عضو فيه من سنه وفدني كتير لما جيت اشتري عربية بس ماكانش عندي حاجه افيد بيها لسه.
دلوقتي وبعد سنه مع الكيا سيراتو الكامله سعودي أقدر ان شاء الله افيدكم واشارك معاكم بخبرتي المتواضعة.
عشان نقدر نحكم علي عربيه او نقارن بين كذا عربية لازم نثبت العوامل المؤثرة في المقارنه زي الطريق وحالته, اللي سايق و خبرته ,يعني المقارنات السابقه مش دقيقه لانها مبنية علي خبرات مختلفة لاشخاص مختلفة في ظروف مختلفة.
بالنسبة لموضوع الثبات في السيراتو انا معايا المواصفه اللي تحت الهاي لاين جنط .17 العربية علي اي طريق محترم ملهاش حل بتوصل ل 180 وهي ثابته جدا زي طريق مصر الاسكندرية الصحراوي وده طريق مطابق للمواصفات العالميه بجد بتحس بأن الجنط ال 17 نعمه.
الثبات علي الدائري بالنسبه لحاله الطريق ومطبات الهوا العربية تمام لغاية 140 : 150 بردو ثباتها ممتاز بالنسبة لحالة الطريق.
ملحوظه الجنط ال 17نعمه علي الطرق المحترمه ونقمه علي الطرق المكسره او الخشنه او اللي فيها مطبات هواء لانه بيرفع تأثير العوامل دي علي ثبات العربية. بس اللي بيسافر كتير افضل له ال 17.
نسبة كبيره من الحوادث سببها اللي سايق وبما ان العربيه سحبها قوي والاتوماتيك فيها تجميعها سريع فبتغري اللي سايق انه يطير مع طرق ضايعه وحفر و مفاجأت فطبيعي ان الحوادث تبقي قاتله حتي ماسكة الدريكسيون ليها دور في الثبات نسبه كبيره مننا بيسوق بايد واحد و يمسك الدريكسيون بتراخي ودي كارثه.
تفتكروا ليه الطرق بتاعتنا السريعه اقصي سرعه 90 ؟؟؟؟؟
لان الطرق ما تحتملش اكتر من كده حالتها وانحناءتها مع السرعات اللي اعلي من كده بتقلل من تحكمنا في العربية في الظروف العاديه و مفيش تحكم في الظروف الخاصه او في حاله الحوادث لا قدر الله.
لكن العربية بصفه عامة ممتازه بالنسبه لسعرها و شكلها وامكانيتها.
معلش طولت عليكم وربنا يسترها معانا كلنا.