[بيكو معروف]

انا بفكر اعمل مشروع مغسله سيارات وكاركير ايضا وبصراحة انا لفيت علي الموضوع ده كتير جدا وربنا وفقني وعرفت معلومات كويسه جدا عن هذا المشروع وفكرت ان انا اكتب موضوعي هذا علشان نتبادل الخبرات والمعلومات عن هذا المشروع علشان الفائده تعم علي الجميع
بدايه المشروع
1- اهم شيء المكان المناسب لازم يبقي المكان واضح والناس شايفينك لان مستوي الخدمه تعتمد علي الابهار والاندهاش للزبون
2- مساحة المحل لاتقل عن 8*8 يعني 8 طول و8 عرض وكل مايكون اكبر كل مايكون احسن ولو مالقتش المساحه دي كعرض للمحل وده صعب شويه تلاقي عرض كبير يبقي المحل يكون له مدخل للسياره ومخرج للسياره علشان ماتحصلش اي ازمة في الشغل
3- العمال وده ممكن يجيب المشروع فوق او تحت العمال والمكان هما المشكله الرئيسيه في هذا المشروع لازم تلاقي عمال كويسين وولاد حلال وامناء ويتحملون ضغط الشغل يعني من الاخر ناس بتاعت شغل وشقي مش جايه تتدلع
4-المكن اللي حتشتغل بيه وده مش قضيه خالص ...............

اول حاجه ماتور مياه مع بلونه يكون حصان او حصان ونصف حسب اللي انت تشوفه معاه عدد 2 مسدس مياه نصيحة ماتشتريش حاجه من شارع الجمهوريه بالقاهره لانهم نصابين او لو مش عايز تجيب ماتور ممكن تجيب ماكينه مياه ضغط عالي ودي حتسهل عليك المواسير والماتور والمسدس ومتوافر منها الايطالي والالماني وانا انصح بالالماني ......................... ........

ماكينه بخار انا عن نفسي شفتها وشوفت انها مالهاش لازمه بس برضه مهمه يعني ازاي هيه مش مبهره زي مابنشفها علي النت هيه اهميتها في غسيل الماتور والمكيف واحيانا سقف السياره والكراسي بس زي مابقولكم شغلها مش فظيع زي ماالكل متخيل
بس حاجه بتعمل عمليه ابهار للزبون بس لشغلك انت مش مهمه قوي
لا انصحكم بشراء ماكينة البخار من شركة msk اللي في دمياط لانها صيني وتعبانه جدا وخرطومها بيضرب علي طول في مكن كويس قوي اسمه seven car wash حلوة جدا بس اليه شويه ب 17000 ......................... ......................... ....

كومبيريسور هواء مع فوم حاجه حلوه جدا ولو مش عايز كومبيريسور هواء في فوم لواحده بيشغل نفسه بماتور بداخله حلو جدا وفي برضه فوم مع ماكينة مياه يبقي اتنين في واحد منه ماتور مياه ومنه فوم ......................... ......................... ....

مكنسه كهربائيه لشفط المياه والتراب متوافره في السوق ب2 ماتور و 3 ماتور هات النوع الصيني اللي 3 ماتور بس ركب له خرطوم ايطالي علشان بيتقطع خرطومها الصيني بسرعه .................

خامات غيل السياره والتلميع والتشميع والتعقيم انا عن نفسي ماشفتش احسن من شركة ميجواير وبرضه السوق ماليان بالبضاعه التانيه ......................... .....................
لو عايز بقي تجيب جهاز صغير لامتصاص الصدمات الخفيفه يبقي كويس والقلم لازاله الخدوش برضه تمام بس مش بيعمل نتايج مبهره وفي ايضا شنطه لاصلاح الزجاج المكسور حلوه خالص
......................... ..

اتمني النجاح لكل الشباب المجتهد واللي عنده معلومات يساهم معانا ومايبخلش علينا علشان الفايده تعم علي الجميع وشكرا

بيكو معروف

لاي استفسار انا جاهز ومستعد افيد اي حد بدون اي مقابل
اللي عايز رقمي يكتبلي وانا ابعتهولوا