المشاركة الأصلية كتبت بواسطة elafreet
اولا: كل الشكر والتقدير الى جميع اعضاء المنتدى الكرام الذين قاموا بالرد عليا
ثانيا : اسف على التاخير فى متابعة الموضوع
كل الكلام السابق على العين والراس
بس انا مش عندى تاكسى قديم علشان ابدله وكمان سامع ان الموضوع ده قرب يتلغى او اتلغى الله اعلم وكمان الشراء من الغير بنظام التوكيل والكلام دا مش مضمون على حسب مابسمع لانه لما يكون التاكسى باسمك بيبقى افضل وانا مش عارف اعمل ايه علشان اشترى ارجو النصحيه
|
لو عاوز تشتري تاكسي قدامك عدة خيارات
اولا : تشتري عربية ابيض و اسود غالبا شاهين او لادا مثلا و هتكون موديل قديم شوية تسعينات او 2001 2002 ............اختيار مش كويس لانها هتكون عربية هلكانة و هتصرف عليها كتير غير ان الابيض و اسود سوقه مبقاش حلو لان الابيض غطا عليه
ثانيا : تدور على تاكسي ابيض يكون مخلص اقساطه او جايب كاش و يبعلك و ده نادر جدا او ممكن تشتري تاكسي ابيض و اسود موديل حديث بعد 2005 شرط يكون ترخيص جيزة و تدهنه ابيض لان الجيزة حاليا بتحول كل الاجرة الي بعد 2005 للون الابيض
الي فات ده كان على المستعمل بالنسبة للجديد ممكن تعمل الاتي ...
اولا : تشتري نمر تاكسي ( ترخيص يعني ) بحوالي من 35 الف ل 40 الف و تشتري العربية الي تعجبك زيرو و تحط عليها النمر بس هيكون ابيض و اسود برضه و كدة كدة هتدهنه ابيض لان القاهرة قدامها شهر او اتنين و تحول التاكسي ابيض زي الجيزة
ثانيا : تدور على تاكسي ابيض و اسود ترخيص قديم معدي عليه 20 سنة او اكتر باي حالة حتى لو دايس عليها القطر ...بشرط انها تكون دايرة و كاملة و تقدم في مشروع الاحلال و تمشي في اجرائات البنك و خلافة و تستلم مكانه بي واي دي او لانوس او فيرنا او اسبيرانزا .........بياخد التاكسي منك و يديك 5000 جنيه بتحطهم كمقدم للعربية الجديدة و الاقساط على 5 سنوات ( 60 قسط ) او تدفع كاش بدون اقساط و العربية بيحسبهالك ارخص من تمنها زيرو عشان ال 5000 جنيه و عشان المشروع بيقلل نسبة من الضرايب و الجمارك على السيارة....... بالنسبة لل بي واي دي القسط 840 للعربية الفول اوبشن غاز..................ده الي انصحك بيه و ده الي احنا عملناه و نسيت اقولك تمن العربية هيكون من 55 الف ل 60 الف ترخيص القاهرة و الجيزة من 60 الف ل 65 الف ( تمن الاقساط للبي واي دي 50400 جنيه فقط )
و نصيحة اخيرة : لو ناوي تجيب تاكسي او تديه لسواقين و لو التاكسي اصلا مش كارك و لا شغلتك او جديد في عالم التاكسي ............نصيحة اخوية بلاش تقدم عالموضوع ده ............ التاكسي عاوز حد متفرغ له و فاهم كويس و يستحسن صاحب العربية هو الي يسوقها و بلاش سواقين........و الا هتلاقي نفسك في هم و قرف علطول بسبب العربية و هم الاقساط و الصيانة و و و و و من الاخر التاكسي عاوز تاكسجي و مينفعش يتعمل مشروع لحد مش سواق
و اي استفسارات تانية انا موجود