[حسام البورسعيدى]

المشاركة الأصلية كتبت بواسطة samirayad نعم وارد جدا يكون هناك علاقه بين معدل الزيت الكتير وتأخر الأستجابه للتدرج فى النقلات أو عند التحويل من نقله لأخرى وبالتالى أرى تعديل منسوب الزيت بالفتيس والتجربه

الف شكر على الرد يا هندسة .. منور منتداك من جديد يا غالى

اتمنى حضرتك بس تراجع بقيه الموضوع ..

انا غيرت زيت وفلتر الفتيس زى ما ذكرت قبل كده وظبطت منسوب الزيت .. وللأسف الوضع ساء عن الاول ...

الفتيس بقى دلوقتى مش بيرضى يعشق على الـ D الا نادرا وعلشان اطلع بالعربية لازم ارجع على L وادوس بنزين جامد وتبدأ العربية تتحرك سنه سنه (كانى دايس بنزين وسايب سنه بسيطه دبرياج فى المانيوال) لغاية ما تاخد سرعتها شويه (سرعة الغيار الاول) واروح ناقل على الـ D وتبدأ تمشى عادى بس النقلات مش سلسة قد كده (ولكن احيانا تبقى كويسة خصوصا بالليل لكن فى الحر اجارك الله) ..

لفيت لفتى عند كام ورشة شغالين فى الاتوماتيك وكله نصحنى بتغيير الفتيس لانه لو اتصلح هيصرف ومش هيرجع زى الاول ...

وشخصوا المشكلة بان العيب فى مجموعة كلاتشات الطلعة (المجموعة الاولى) ...

ولكن انا شاكك فى ان العيب فى القربة (محول العزم) او مضخة الزيت ...

عموما قررت انى اشترى دماغى واغير الفتيس .. سألت عليه وسعره تراوح ما بين 800 و 1000 جنية استيراد هنا فى بورسعيد .. والحمد لله العربية حاجتها متوفره ومفيش مشاكل ...

والحمد لله عرفت ميكانيكى كويس (اللى عملى موضوع الفرامل) وميزته انه فى بنك الاسكان (منطقة محلات الاستيراد او الشونة يعنى) مش فى الحرفيين .. يعنى لو احتجت حاجة فى لحظة هشتريها ...

والميزة ان الميكانيكى ده من النوع المزاجانجى .. يعنى بيشتغل فى عربية عربية ..

فقالى اصبر عليا يومين بالظبط اخلص عربية هتسقط مكنه ونعمل عربيتك بمزاج قلتله ماشى ...


هو ده الموقف لغاية دلوقتى .. ارجو لو فى اى نصيحة ممكن تنفعنى متبخلوش عليا بيها ..

واتمنى تتابع معايا يا باشمهندس سمير لأن رأى حضرتك يهمنى جدا ...


والف شكر مقدما ...