[حسام البورسعيدى]

لو تعرف حد متخصص فرامل معروف يبقى خير وبركه واحسن من الميكانيكى ...

عموما المشكلة بسيطة يعنى باذن الله متقلقش خالص ...

بس اوعى تروح لعبقرينو ده تانى ..

لمعلوماتك فرمله اليد ملهاش اى دعوه بالماستر والخزنة لانها شغاله على واير (فرامل ميكانيكية مش هيدروليك زى الفرامل الاساسية) ...

لو الفرامل بتمسك متأخر (يعنى يكون فى فراغ والدراع بيمسك فى اخر مشواره) يبقى الفرامل محتاجة رجلاش .. لو بتمسك بدرى عادى ولكن مفيش فرمله يبقى حاجة من اتنين :

اما التيل باظ ومحتاج يتغير .. او الطنابير الخلفية محتاجة وش ع المخرطة (فيها ريجة يعنى مش ناعمة)

فخليك واقف معاه وبص على الطنابير لو حسيت ان فيها خطوط واضحة ومش ملساء يبقى محتاجة تتمسح ع المخرطة .. وشوف سماكة التيل لو التيل رقيق قوى يبقى جاب اخره ومحتاج يتغير ..

ولو التيل سليم بالمره خليه يصنفرهولك ...


وعلى فكره لما تعملها هتلاقى تحسن واضح فى الفرامل الاساسية باذن الله ...


اتمنى اكون قدرت افيدك يا غالى .. ابقى طمننى عملت ايه ...