عرض مشاركة واحدة
  #16  
قديم 08-07-2011, 12:58 AM
الصورة الرمزية borio1704
borio1704 borio1704 غير متواجد حالياً
من انا؟: أعشق السيارات، أحب اليابانية، الكورية، ولا أفضل الأوروبية
التخصص العملى: استشاري نظم جودة
هواياتي: السيارات - الكمبيوتر
 
تاريخ التسجيل: May 2011
الموقع: جدة - المملكة العربية السعودية
المشاركات: 692
borio1704 has a reputation beyond reputeborio1704 has a reputation beyond reputeborio1704 has a reputation beyond reputeborio1704 has a reputation beyond reputeborio1704 has a reputation beyond reputeborio1704 has a reputation beyond reputeborio1704 has a reputation beyond reputeborio1704 has a reputation beyond reputeborio1704 has a reputation beyond reputeborio1704 has a reputation beyond reputeborio1704 has a reputation beyond repute
افتراضي رد: عربية تقيلة ولا خفيفة؟؟؟ طبعا الخفيفة أحسن

عشان معرفتش أنزل الصور المرة اللي فاتت، قررت إني أعيد نشرها بالصور


المرة دي حنتكلم عن "التماسك"، والتماسك زي ما قلنا قبل كده هو إزاي أخلي السيارة ماسكة في الطريق بحيث اقدر أوجه السيارة زي ما أنا عايز بالظبط.. (التعريف يمكن ما يعجبش بعض الناس من ناحية اختيار الكلمات) ولكن اللي بنتكلم عليه اسمه بالانجليزي "Traction" وبعض الناس بتسميه "الالتصاق بالطريق"، والكلام ده باختصار بيتكلم عن قدرة إطارات السيارة على توجيها بكفاءة عالية، بمعنى إنها العلاقة بين الإطارات والطريق، بس مش معنى الكلام ده إننا حنتكلم هن الإطارات وبس، لإن الإطارات هي حلقة الوصل ما بين السيارة والطريق، إنما السيارة فيها حاجات تانية كتير

عشان نسيطر على السيارة لازم نضمن أن إطارات السيارة دايما ملاصقين للطريق وما بيحصلش أي انزلاق أو زحلقة ما بينهم، والانزلاق ده ممكن يحصل في كذا حالة زي:
• تعويم السيارة في المنعطفات
• فرملة قوية جدا
• انطلاق قوي جدا (أمريكاني)
• وجود زيت أو رمل أو مياه على الطريق

أهم حاجة في الإطار إنه يبقى في قوة التصاق جامدة في الأرض، وده بييجي من حاجتين رئيسيتين:
أول حاجة: علاقة نوعية الكاوتش مع نوعية الأرض اللي حيمشي عليها، ودي بنسميها (معامل الاحتكاك)، عشان كده بنلاقي كاوتش مخصص للأسفلت، وكاوتش للثلوج، وكاوتش للطرق الرملية .. إلخ، ومعروف إن كل ما كان الكاوتش طري معامل بيبقى أحسن من ناحية الثبات بس معدل التآكل بتاعه بيبقى أعلى.
ومعامل الاحتكاك ده حيتأثر لو فيه مواد تانية بين الإطار والأرض، زي المياه والزيت والرمل.

تاني حاجة: مساحة التلامس بين الكاوتش والأرض، ودي متعلقة بعرض الإطار ونقشته، وكل ما زادت مساحة التلامس زادت قوة الالتصاق، بمعنى إن كل ما الإطار عرضه زاد زادت مساحة التلامس وزادت قوة الاحتكاك.






معنى الكلام ده إن أحسن كاوتش هو الكاوتش الأملس اللي ما فيهوش نقشة!!!! بس ده على الطرق الجافة المستوية بس، إنما لو حصل إن فيه احتمال لوجود مية أو رمل في الشوارع يبقى لازم نعمل في الكاوتش نقشة تساعد إن المية تتصرف من تحت الإطار ويفضل الكاوتش ملامس في الأرض. وهي دي الحالة اللي معروفة في الكاوتش بتاع العربيات العادية.



محصلة الحاجتين دول هي قوة التصاق الكاوتش مع الطريق، واللي لازم تبقى أكبر من القوى المضادة نتيجة انتقال الوزن في المنعطفات أو الفرامل... أو لو قوة الدفع من العجلة نفسها كبيرة بحيث إن العجلة تلف بسرعة أكبر من سرعة السيارة.

يعني لو حصل إن القوى المضادة دي بقت أكبر... بيحصل الانزلاق

مهم برضو إننا نفهم إيه اللي بيحصل للكاوتش في الملفات

طبعا الكاوتش مادة مرنة، بس المرونة دي ممكن تبقى سبب في نقص التماسك نتيجة إن الكاوتش بيتلوي في الملفات، بتأثير انتقال الوزن، فممكن مساحة التلامس تقل وكمان ممكن تغير وضعية السيارة وتخليها توصل للنقطة الحرجة زي ما اتكلمنا قبل كدة.



وعشان نقلل من تأثير انتقال الوزن يبقى نحاول نقلل من ارتفاع جانب الإطار بحيث يبقى عرض الإطار أكبر من الجوانب بشكل واضح، وده السبب الأساسي إن السيارات الجديدة بتركب كاوتش بجانب منخفض (65%، 60%، 55%)







الكلام ده حيوصلنا لموضوع له علاقة مهمة بتوزيع الوزن في العربية (تاني؟؟؟؟؟؟) وزي ما قلنا قبل كده الاتزان والتماسك مرتبطين ببعض.

فيه ظاهرتين معروفين في المنعطفات بيحصلوا في المنعطفات الضيقة مع السرعة العالية أو في الحركات المفاجئة:
الانعطاف الزائد أو الـ"Over Steer"
الانعطاف الناقص أو الـ"Under Steer"
وده نتيجة إن القوة المضادة على العجل الخلفي أو الأمامي بتبقى أكبر بكتير من قوة الالتصاق بتاعة الإطار

الانعطاف الزائد هو إنك تبقى عايز تدخل الملف تلاقي العربية لفت زيادة عن ما إنت عايز، وده بيحصل عادة في السيارات الجر الخلفي (على عمود كردان)، وبيظهر أكتر لما يكون تركيز الوزن (مركز الثقل) في ناحية الخلف وبرضو لو قوة دوران العجل الخلفي أقوى من قوة التصاق الإطار.




الانعطاف الناقص بيبقى بالعكس!! بمعنى إنك لما تدخل الملف تلاقي العربية مكملة في طريق شبه مستقيم وما تلفش، وده بيحصل عادة في عربيات الجر الأمامي (على كبالن)، بسبب إن مركز الثقل ناحية الأمام.




طب ليه كده؟؟؟

لو انت داخل ملف وحاولت تقلل سرعتك (وده العادي اللي كلنا بنعمله)، الوزن بيتنقل للأمام في الجهة الخارجية للملف، في الحالة دي العجلة الأمامية الخارجية حتشيل أكبر حمل





ولو انت داخل الملف وزودت سرعتك، الوزن حيتنقل للخلف، وفي الحالة دي العجلة الخلفية الخارجية حتشيل أكبر حمل




ولو أخدنا في حسابنا اختلاف مركز الثقل بين العربيات الدفع الأمامي والعربيات الدفع الخلفي يبقى لازم نغير طريقة دخول الملفات والخروج منها حسب العربية اللي سايقينها... ودي ممكن نبقى نتكلم عليها في موضوع لوحده

فاضل حاجة كمان
لو فرضنا إن الطريق فيه مطبات (لو؟؟؟؟؟ هو فيه طريق من غيرها؟؟؟) فيه مشكلة تانية حتحصل

العجل اللي نازل طالع ده... مش دايما بيلمس في الأرض، وخصوصا لو المطبات دي قريبة من بعضها أو لو ماشيين بسرعة عالية، ودي من أكتر الحاجات اللي فعلا بتعمل حوادث بسبب إن السيطرة شبه معدومة وكإننا طايرين في الهوا، واحنا قلنا قبل كده إننا عايزين الكاوتش دايما ملاصق للطريق.




طب ليه بيحصل كده؟؟؟

إحنا كنا اتكلمنا قبل كده على نظام التعليق وإنه يشيل وزن العربية ويحافظ على ثبات وضعيتها... طيب وزنه هو أخباره إيه؟؟؟ يعني وزن نظام التعليق نفسه مهم ولا لأ؟؟؟؟

في الحقيقة كل ما كان أجزاء نظام التعليق خفيفة كل ما كان ليها القدرة إنها تمسك في الطريق أحسن، لإنها بتبقى خفيفة فالسست بتحرك العجل بسهولة وتخليه دايما ملامس للأرض بكل تفاصيلها، وزن أجزاء التعليق دي بيسموها "الكتلة غير المحمولة" أو "Unsprung Mass"، العربيات الجديدة بيبقى فيها مقصات ألومنيوم عشان السبب ده، ومن أحسن الطرق عشان نقلل الوزن ده هي تركيب جنوط ألومنيوم (كثافة الألومنيوم = ⅓ كثافة الحديد).

لحد هنا نقدر نقول إن دي أساسيات ثبات السيارات بشكل عام، وواضح إن كل ما كان الوزن أكبر كانت السيطرة عليه أصعب وعايز شغل هندسي أعقد


بس التكنولوجيا كمان وصلت عشان تزود الثبات، وده موضوع كبير حنتكلم عليه بعدين


....
رد مع اقتباس