اخواني الاعضاء الاعزاء
بعد التحية الاسلامية الواجبة وهي السلام عليكم ورحمة الله وبركاته
لقد اتعبني وآلمنى ماحدث وما يحدث من انشقاق وفرقة وشروخ كبيرة في المنتدى
واحنا اولا في الايام المفترجة دي ايام شهر شعبان وهو الشهر الذي اختص الرسول صلى الله عليه وسلم نفسة باهميتة لانه منسي بين رجب(شهر الله) ورمضان(شهر امة الاسلام)
(وكان (صلى الله عليه وآله وسلم) يقول : شعبان شهري من صامَ يوماً من شهري وجبت له الجنّة )
وايضا في نفس توقيت الاحتفال المزمع عقده بمناسبة اتمام المنتدي ثلاثة اعوام من عمرة المديد بأذن الله
ماذا حدث؟؟؟....ولماذا حدث؟؟؟
سؤالين صغيرين في الكلمات كبيرين في المعنى
لماذا لم تحل الامور بعقلانية مغلفة بعاطفة الحب والانتماء للمنتدى
لية كل شوية اعضاء خدو جنب لوحدهم وعملو زي شله واحدة
لية كلنا لم ندوب في الشلة الاكبر وهي اسرة مصر موتورز
هل لاننا المصريين مانحبش ومانعرفش العمل الجماعى
هل الغيرة احيانا تعمل كدا
لية بنساعد بعض واحنا منتظرين رد الشكر والجميل
لية مايكونش مساعدتنا لبعض عشان ربنا يبعت لينا اللي يساعدنا في وقت شدتنا
حتقولولي لأ ازاي احنا بنساعد بعض
اقول لأ....
مال الناس بخلافاتنا الجانبية
يعني س من الناس او ص من الناس اختلف مع احد ما من الادارة
اقوم اعاقب بقية الاعضاء بعدم دخولي تاني او عدم مشاركتي تاني في المنتدى
تبقى فين المساعدة بقى لوجه الله
هو احنا بنساعد عشان منصب اداري ولا اشرافي ولا حتى لقب شرفي
اية قيمة الاشياء دي كلها جنب واحد سواء عضو او زائر للمنتدى دخل وشاف معلومة واستفاد بيها
وحتى من غير مايشكر ولا يعلق كفاية انه في سره قال ربنا يبارك لفلان او علان دانا كنت حاروح في حيس بيص لولا مساعدة فلان او علان او س او ص
وبعدين خرج بعض الاعضاء بعد خلافهم مع الادارة وقامو بتاسيس منتديات اخرى وياريتها لتخصصات اخرى ...لا للاسف
نفس التخصص.....الله... يعني ايه بقى دا.!!؟؟؟؟
يعني انا من غير ماضرب مثل لحد لحسن يزعل لحسن دلوقتي الزعل بقى للركب وبسبب وبدون سبب
انا س من الناس كنت باساعد الناس عشان غرض معين ولما اختلف التوجة بتاعى عن توجة المنتدى روحت احارب المنتدى بمنتدي مشابه وبرضة اقول فية اني باساعد الناس
انا اعتقد اللي يحب يساعد الناس يساعدهم باي شكل واي صفة ان شا الله زائر مجهول
المهم ان لا تنتظر اي عائد لمساعدتك الا من الله سبحانة وتعالى
طبعا هتهاجم من الاعضاء اللي تركو المنتدى بحجج كتير اسهلها التقرب للادارة ومحاباتها
والله وربنا اعلم بضميري بان ماحدث هو ما جعلني متاثر تمام التاثر وكتبت الكلام دا دون اعداد مسبق او ترتيب حتى مع نفسي لانه هالني ما اري
كل مكان ناجح لازم يقوم على اولا الانضباط وتنفيذ القوانين بمنتهى الصرامة
يعني اوروبا وامريكا سبقونا بايه وهما معندهومش اي قيم اخلاقية او ضمائرية يخافو منها
لأ طبعا...اول حاجة اهتمو بها تسنين قوانين منظمة لمعيشتهم وحياتهم وعملهم
القوانين دي تحارب التسيب والانفلات واللي يعمل اي حاجة على هواه دون رابط او انضباط
عشان كدا وصلو لما نحن فشلنا وبجدارة فيه
والمنتدي خير شاهد على كلامي فهو مجتمع مصغر لما يجري في المجتمع الاكبر
نحن الان نعيش اكبر انفلات امنى او اخلاقي ودا لازم ينبع من الناس نفسها
مش لازم تلاقي ضابط باصصلك عشان تخاف وتقفل الحزام بسرعه عشان المخالفة وتفكة لما يديلك ضهره
الانضباط والاحترام لو مش نابع من جوة الانسان يبقى انسى اي حاجة يتعلمها واي حاجة يشوفها
حايبقى محتاج كرباج مسلط على رقبتة عشان يادوبك يبقى متحضر
وقديما قالو الحر تكفية النظرة والعبد تكرعه العصا
ارجوكم حاولو لم الشمل مرة اخرى
الرجاء كل الرجاء عدم مهاجمة احدنا الاخر او تعمد اصطياد الاخطاء مهما كبرت او صغرت
احنا ناس كبيرة مش صغيرين عشان نعمل مع بعض كدا
نهاجم بعض ونخون بعض ونعادي بعض بسبب او بدون
يارب اهدي الجميع
والله الموفق والمستعان
والسلام عليكم ورحمة الله وبركاته