رد: عقدة دهان الفبريكة
شكراً يا ايمن على الطرح المفيد وانا معاك فى بعض الجزئيات ومش معاك فى الاخر وهوضح بالتفصيل علشان الموضوع ليه اكثر من جانب
اولاً عايزين نفرق بين
1. دهان الفابريكا
2. ما يسمى برش نظافة ( لعلاج الخدوش )
3. دهان جديد تماما (لعلاج حوادث )
4. دهان الستايلنج ( للناس الرايقة )
دهان الفابريكا طبعاً اكثر دقة وبيتم بميكنة حديثة وبمراحل احيانا ما بتكون معقدة وفعلاً افضل جودة وقيمة من الدهان المضاف
وفى نقطة القيمة ديه لازم نفرق برضو بين دهان عربيه فى فئه 50 غير 100 غير 200 الف
كل ما كانت العربيه فى فئه اعلى كل ما كان الدهان الاصلى قيمتة اكبر
2. دهان الخرابيش ومعالجتها ولو وصلت لاعادة الدهان وهو ما يسمى برش نظافة ممكن يكون قيمة مضافة او سلبيه
المهم ان رش النظافة ده مفيهوش استخدام الرد بالنار او الحموات واللى بيحصل ان العربيه تتسنفر كويس اوى وتاخد معجون خفيف على اى انبعاجات بسيطة وتتسنفر تانى وتاخد فيلر وتترش وتاخد حقها فى الفرن وتاخد حقها من الخامات والورنيش وبعدين تطلع تتسنفر بالبولش مرة واتنين
لو انت عملت ده فى عربيه موديل 2000 فيها خرابيش يبقى عليت من قيمة العربيه مش قللت
بس هى المشكلة ان واحد زيي لو هشترى عربيه مرشوشة على اساس انها نظافة لازم هضطر افك البيبان والرفافر وشوف من الناحية التانية انها فعلا مش واخدة حموات
3. اعادة الدهان الكامل وده النوع الاقل قيمة او الاكثر تأثيرا على قيمة العربيه
وكل ده احنا بنتكلم عن الدهان الخارجى بس مش الداخلى
الدهان الكامل معناه ان العربيه نظراً لحادثة مش خرابيش اخدت بنط وحموات ويمكن زراجين علشان تتعدل تانى
وده معناه حاجات كتير
متانة الصاج نفسها اتغيرت ، الحموات مسمعة فى الناحية التانية من الصاج (الدواخل) مثلا دواخل البيبان او الرفارف وغالباً بيترش من بره بس وبالتالى بيبقى الداخلى عرضة للبارومة
المعجون اللى لازم هيبقى بطبقات اسمك ومعالجة الدهان اللى ياعالم تمت صح ولا لاء وحاجات كتير بتدخل المشترى الحريص فى شك ومحتاج يراجع على كل سم فى العربيه
ويبقى ان واحد جايب العربيه جديد او مستعمل ومش عاجبة لونها وحالة الصاج نظيفة وكلف العربيه وطلع تحفة فنية ديه فيه كتير بيقدر وبيفهم وبيعتبر ان الشغل ده قيمة مضافة للعربيه مش حاجة تقلل من قيمتها
وبنشوف ناس كتير بتعلن عن عربياتها وتقول اللون الاصلى كذا وتم تغييره لكذا وبوية نوعها كذا والمعاينة بتفصل
وده شائع فى البى ام والسيفيك والجولفات والعربيات الشبابية عموماً
ويبقى ان فيه تجار وناس طبعاً بتحب تقلل من تمن العربيه باى تلكيكه وخلاص
الخلاصة ان الدهان عموماً قيمة مهمة فى العربية زى ما بنقول العربيه فيها كاسيت وسنتر لوك الدهان برضو قيمة الدهان وحالة الصاج مهمة
__________________
اخر موضوعاتى
قريباً تقرير وتجربة اداء دايهاتسو تريوس * تويوتا راش
|