[Ahmed Anwer]

كنت ماشي في مصر الجديدة

شارع محمد فريد بتاع نادي الشمس

و اذ فجأة المح التحفةة كيا سوول

واقفه قدام معرض سيارات

مكدبتش خبر ،،

نزلت اتفرج عليها ،،

مبدئيا شكل العربية من بره تحفة جدا جدا

عامله كده زي العربيات الايكونيك ،،

عربية تحس انها متميزة و لو ركبتها هتخطف الأبصار ،،

ثورية باحساس رياضي و شياكة

مش ميكروباااص خاااالص

حاجة اقرب للكروس اوفر و الاس يو في منها للميني فان

سألت البياع عن المواصفات ،،

الحمد لله ،، البياع مش فاهم اي حاجة في أي حاجة ،،

بس انا عرفت انها 1600 سي سي طبعا

جنوط اسبور 17 ، فتحة سقف ، كروز كنترول ، مالتي فانكشن في الطارة ، اير باجز ، ايه بي اس

دول اللي استكشفتهم لوحدي بذكائي

العربية من جوه خامات تحفة تحفة تحفة لاقصي درجة

و تقفيل ممتاااااااااااز ،،،

التابلوه مش فوم طري هوا بلاستيك بس خاماته غريبة تحس انه ليه ملمس ناعم و طري كده غريب

انضف من السيراتو الجديدة

و ده غريب جدا لان معروف ان الفئة دي من السيارات و حتي الاس يو في دايما بيكون صالونها فقير

و كله طبعا بيلد ان جاااي من بلاده

السقف مش عالي زي سقف الماتريكس و الماتيريا و الاسكودا رومستر

القاعده مريحة جدا و واسعة

العيب الوحيد الشنطة صغيرة جدا جدا اضغر كمان من شنطة الماتريكس

و كمان مع الباب الخلفي مش بعرض العربية

و ده هيبان من الصور

بس طبعا بميزة تطبيق الكرسي الخلفي زي معظم العربيات الهاتشباك حاليا

غير كده الصالون بجد من الصالونات اللي متبقاش عايز تنزل منها

بسأل البياع بيقولي دي من التوكيل بضمان

قلتله يا عم انتا بتقول ايه ،،،

دي لو من التوكيل كان زمانه فضح الدنيا في الجرايد

قلي طب اسأل كده ،، قالي اسف خليجي ،،

طب يا عم بتدوا عليها ضمان

قالي اه حاضر من عينيا !!!!!

اي كلام في البتنجان

طنشته يعني عادي

طب ي عم بكام

138 الف جنية

و دي كانت الحسرة

ايه يا عم ده ،، ما انا اجيب سيراتو احسن

قالي فعلا سيراتو احسن

طبعا اي بتنجان ،، أنا شايف السوول احلي

بس برده السعر عاااالي عااااالي جدا جدا

و محروق ابو بيتر شراير لو هيغلي عربيات كيا كده ،،


الخلاصة ،،

عربية تحفة تحفة تحفة لأاقصي درجة

و انضف من الماتيريا و الماتريكس و حتي التريوس بكتير

و مش انضف من الرومستر بس مميزة عنها بكتييييييييييييييييير

و احساسي انه تاجر جايب شروة و عايز ياخد وش القفص

اتمني ان الوكيل ينزلها قريب

و يضبط سعرها زي ما ضبط السيراتو

اللي كان تجار الخليجي مبالغين في سعرها جدا جدا

بالمناسبة علي فكرة البياع بيقولي الوكيل ده نصاب

و السيراتو الجديدة بيقول عليها ب 116 الف

و لما الحجز يوصلك بعد تلات شهور هتكون وصلت 124 الف

بس العربية السووووووووول دي خطيرة جدا

عربية شبابية شغالة ، عائلية شغالة ، حريمي شغاله ،، رياضية شغالة برده

متميزة و ثورية ،،،،، اكيد

اسيبكم مع الصور

و كالعادة تحملوا موبايلي ابو صور تعبانه

و كمان بليل و في عجالة

فغالبا مش هتشوفوا حاجة ،،، ههههههه


بس هوا اثبات لوصولها للاراضي المصرية

اسم المعرض ،

Auto Reda Hamza

العنوان

88 ش محمد فريد - جامع الفتح - مصر الجديدة

ت :

0106667255 / 26354040 / 22404140