[akerima]

والله يا اخي انا مكنتش ناوي ارد علي اي مواضيع سياسية تاني في المنتدي لكن بعد لما شفت موضوعك والردود علية مقدرتش امنع نفسي من المشاركة وبعد كمان ملاقيتكوا انت وابو نور داخلين في بعض شمال وخصوصا ان بكنيلكوا انتوا الاتنين معزة خاصة واتضايقت جدا من ردودكوا علي بعض لاقيت ان لازم ارد - يا ريت يا جماعة نقلل شوية من وصفات الطبيخ عشان الموضوع مش ناقص انا كنت دايما معترض علي مقولة الجيش والشعب ايد واحدة عشان كده احنا بنحط الجيش في ناحية والشعب في الناحية التانية مع ان الاتنين في فعلا واحد من غير قولان ويوم ما الجيش يتضرب مصر كلها راحت في داهية

بس انا ححكي للاخ الظابط حكاية شخصية جايز نطلع منها بحاجة

انا ساكن في الشارع بتاعنا بقالي حوالي 5 سنوات وكنت دايما بشوف ناس اقول عليهم بلطجية وبتوع مخدرات اكيد وشكلهم غلط وكنت دايما بتحاشي التعامل معاهم او حتي النظر ليهم الا ان جاء يوم 28 يناير ونزلت في المظاهرات والغريب اني لاقيت في ناس من الجماعة دول معايا ولما سالتهم بتعملوا اية هنا قالوا كلام انا نفسي استغربت اني مكنتش فاهم الموضوع زي ماهما فاهمينة ولما عملنا لجان شعبية ووقفت معاهم زيادة عن 10 ايام اتضحلي انهم اغلب من الغلب بس جايز فهمهم للامور ضعيف ومحتاجين حد يقف يقولهم اية الصح واية الغلط ويقنعهم بية والناس دي خلي بالك اسهل بكتير انك تقنعهم وهما محترمينك من انهم يسمعوا كلامك وهما خايفين منك والنتيجة طبعا بتبقي احسن

معني كده ان لسة في مصر ناس بتتعلم اية الصح من الغلط واحنا علي اول سلم الديمقراطية وممكن يكون فية واحد انت شايف انة بلطجي وابن ستين تيييييت بس في الاخر هوا راجل غلبان وبعمل كده من كتر ما شاف من زل وان كنت انت زعلان علي زمايلك اللي استشهدوا هوا ممكن يكون مقهور علي ابنة اللي ملقاش مستشفي تعالجة لحاد ما ربنا افتكرة الله اعلم بما في نفوس الناس

لكن في الاخر انا عازرك لان مش من السهل يبقي الانسان وهوا بيادي واجبة مفيش علي بالة هوا حيرجع لاهلة ولا لأ ربنا يحميك انت واللي زيك ويحمي شعب مصر كلها من الايام اللي جاية

واللي قال ان ثورة مصر منقوصة عنده حق لان الثورة شالت راس النظام لكن مقدرتش تغير النظام لان النظام اتزرع فينا احنا شخصيا في عادتنا وتصرفتنا وعدم احترامنا لاي قوانين مهما كانت عبيطة لمده تزيد عن 60 سنة يعني تقريبا جيلين كاملين ومش من السهل نغير دا بالسهل لا في شهور ولا سنين لازم حناخد وقتنا بس للاسف الوقت دا علي حسابكوا انتوا - انتوا اللي لازم تشيلوا المسؤلية دي لانكم من الشعب والشعب منكوا وانتوا اللي اختارتوا تشيلوا المسؤلية دي سواء مخيريين او مرغمين

انا شايف ان موضوعك فية الكثير من الحقيقة لكن كمان فية خوف زياده عن اللزوم مصر زي ما فيها فئة مخربة انت شايفهم كبيرة لان للاسف معظم تعاملاتك معاهم لكن السواد الاعظم يا اما ناس بتحب البلد دي اوي وعايزاها تبقي احسن بلد في الكون وبرضة بتنزل الشارع ومش عارفة اذا كانت حترجع لاهلها ولا لأ بس دا واجبها قدام بلدها - وناس تانية غلابة اداس عليهم كتير ومصدقت تتنفس (ربنا يستر) حياخدوا وقت عبال ما يفهموا فيهدوا لان ملهمش غرض الا لقمة العيش ومش عايزين الا انهم يعيشوا مستورين وبالراحة

والخوف بقي من الفئة المخربة ودي اللي اتمني انك مش تدوس عليها بالبيادة لا بدبابة يا معلم وصدقني محدش حيزعل عليهم عشان دول بهايم مسيريين وتابعين للي بيدفع اكتر ربنا يرحمنا منهم

واقعدوا بالعافية