ياسيدى بس انا امسك الاول وزير و بعدين ربنا يسهل
انا شايف الموضوع و بمنتهى البساطه موش عايز افتكاسه
المشاكل دى اغلبها اتحل فى دول تانيه و نضرب مثال
فى البحرين مثلا لاحظت شوية حاجات حلوه و قولت سبحان الله يعنى العباقره بتوعنا موش عارفين يبعتو لسفاراتنا اللى فى الدول دى و يقولولهم شوفولنا حلول ل مشاكلنا فى الدول اللى انتو فيها؟
مثلا:
اليوترن حطو عليه كاميرا و اى واحد عايز يلف لااااااااازم يكون فى اول حاره شمال يعنى لو فى تانى حاره ياخد مخالفه محترمه و دى السبب فى انى لاحظت صف عربيات طويييييل واقف فى الحاره اللى فى الشمال و عايز يلف و باقى الطريق فاضى للى عايز يلف
و كله متصور طبعا يعنى موش هاتقول امين الشرطه مستقصدنى و بالتالى دى لو طبقوها فى شارع الهرم او الكورنيش عمره ما هايقف
الحاجه التانيه راسمين الخط الابيض اللى مقسم الطريق ل حوارى
لو انتو فاكرين الحوارى دى كانت عندنا فى مصر زمان و موش عارفين لازمتها ايه و فى الاخر بطلو يرسموها و بعدين رسموها تانى لما اوباما جه مصر
المقصود ان ممنوع حد يمر على الخط ده ولا يمشى عليه الا بشروط قاسيه انه لازم الحاره الللى داخلها مايكونش فيها حد على مد البصر وراه و طبعا دى لو طبقوها عندنا هاننسى ان عربيات تحك فى بعضها و هاننسى كلمة ان العربيه راششه
الحاجه التالته الاشارات كلها اتوماتك و عليها كاميرات و الللى شايف نفسه راجل يكسر الاشاره
طبعا دى طبقوها عندنا فى مصر فى بعض الاشارات و نجحت جدا
الحاجه الرابعه هنا فى السعوديه ان المخالفات موش ثابته يعنى سائق الشاحنه لما يمشى فى الحاره الشمال اول مره يدفع مخالفه لو عملها تانى يبقى راجل مخه تخين و فى الحاله دى سجن 4 ايام على ما اذكر اما لو عملها تالت يبقى الراجل ده غلط انه يسوق اصلا و يمنع من القياده فى هذه المدينه الى الابد
الحاجه الخامسه دى طبقوها فى سويسرا و عاجبانى ان المخالفه موش ثابته دى نسبه من ثروة المخالف يعنى الفقير موش هايدفع مخالفه زى واحد مليونير لدرجة ان اغلى مخالفه فى العالم كانت فى سويسرا لواحد ملياردير خالف السرعه
تقريبا كانت اكتر من مليون وكله طبعا فى مصلحة الدوله
ده يارجاله البرنامج الانتخابى بتاعى و حسكو معايا و الله الموفق
