الحقيقه موضوع العربيات دا بيبقى محير جدا جدا بس نصيحه متشتريش عربيه الا بعد لف ودوران لمده لا تقل عن شهر
لان انت بتشترى عربيه ودفعه فلوس اد كدا والله اعلم الناس بتتعب اد ايه على ما بتجيب الفلوس دى
فعشان تبقى حطيتى فلوسك فى حاجه محترمه ومريحاكى لازم تتانى جدا جدا جدا
بالنسبه بأه لحكايه العربيه الى تناسبك الحقيقه كل العربيات الى تتخيليها فى عيوب ومميزات والى بيفرق واحد عن التانى على حسب هو ايه الى محتاجه فى العربيه
بدليل ان الشارع مليان كل انواع العربيات , انا شخصيا فى عربيات بعتبرها عربيات زباله جدا وبلاقى ناس كتير جايباها اكيد لان اصحابها لقو فيها الحاجه الى مريحاهم لكن انا مثلا مش لاقى فيها المميزات الى بحبها وهكذا
يعنى الامر فى الاول والاخر راجع ليكى
انا شخصيا اكتر حاجه بتهمنى فى العربيه انها تكون صناعه محترمه وموتو محترم ومبهتمش بالاوبشنز او الشكل الخارجى
فى ناس تانيه بتحب الاوبشنز وحاجات الرفاهيه اكتر من جودة العربيه بدليل الاسبرانزا الى منتشره انا شخصيا بحتقرها لكن فى ناس كتير بتحبها عشان الرفاهيه والحاجات دى وكل واحد من حقه يجيب الى بيريحه
فانت الى عليكى تعمليه انك تسمعى كل الاراء وفى الاخر تكونى رايك الشخصى
بالنسبه لرأيى بأه
الحمد لله لسه انا واسرتى شاريين عربيتين الحمد لله
الاولى بعد لف ودوران كتييييييييير جدا وكنت اهم حاجه مركز عليها ان العربيه متبقاش كورى او صينى كنت عاوز اجيب عربيه العمر الى تفضل معايا واكون مبسوط وانا راكبها لانى الحقيقه بتمزج من الماركات المحترمه حتى لو شكلها وحش وفى حدود الفلوس الى كانت معايا كانو حوالى 125
استقريت على لانسر بوما 2010 1600 cc على الرغم انها منتشره جدا وشكلها قديم وبتنزل من 2003 وماليه الشارع المصرى (دا عشان هى عربيه ممتازه) لذلك يتعدو على الصوابع الى اشترو الموديل دا الى فيه الفتيس الجديد لان فى ناس زهقو منها الا انى حبيتها جدا ومقتنع بيها جدا خصوصا ان كل مسمار فيها يابانى وحققت لى الى انا عاوزه انا تنازلت عن الشكل الجديد ورضيت بانها منتشره يعنى مش هبقى مميز ,لكن كسبت الى انا محتاجه فيها المتانه والموتور وماركه نضيفه جدا
بما انك معاكى حوالى 100 يبقى ممكن تشوفى المانوال منها 1300 cc كل الناس الحقيقه بتشكر فيها وبيقولى ان الماتور معقول جدا ومش صغير دى تقريبا هتبقى فى حدود حاجه وتسعين
وبردو فكرت قبلها فى النيسان بس الحقيقه شكلها مشدنيش عجوزه الى حد ما وبقت بتتقفل فى مصر بس هى يابانى ممكن تقفيلها ميبقاش عيب لكن انا الحقيقه مستريحتش لحكايه التقفيل المصرى
لكن ناس كتير جدا بردو قالو عليها عربيه محترمه ودى بردو هتبقى فى التسعينات وممكن تبقى اوتوماتيك كمان
تانى عربيه كانت فى حدود 80 الف وبعد لف ودورااااان كتيييييييير جدا وكنت مصر انى بردو ابعد عن الكورى الا انى اكتشفت ان بالسعر دا لازم اجيب عربيه كورى ومفيش غير الكورى بالسعر دا الا فيات بونتو -ايطالى- بس عيبها انها هاتش باك وانا كنت عاوز عربيه اكبر
المهم بعد حيره بين الافيو واللوجان والاكسنت واللانوس
استقريت على الاكسنت الحمد لله وتقريبا اخدنا اخر عربيه اكسنت فى مصر كلها :D
عشان دى تقريبا العربيه الوحيده السيدان الى بالسعر دا تقفيل كورى لكن الباقيين كلهم تقريبا تقفيل مصرى
المهم ان الاكسنت الصراحه كانت احسن عربيه بالنسبالى بالسعر دا لكن تقريبا انا اخدت اخر عربيه
لكن غير كدا الحقيقه معتقدش ان الباقيين دول كفائه لان الصراحه انا كنت خايف وانا بجيب عربيه بالسعر دا لان معظم العربيات الى بالسعر دا بتقلب شخشيخه بعد كام سنه
فلو هتجيبى عربيه فى الحدود 80 او 85 هتضطرى تسالى ملاك العربيات الى بالسعر دا وتشوفى ايه عيوبهم ومميزاتهم وهتحتاجى تلفى اكتر
عموما زى ما قلت لك انت هتسمعى كل الاراء وفى الاخر هتكونى رأيك الشخصى على حسب احتياجاتك
وده راى والحقيقه انا متعصب ضد الكورى وبستخسر فيه عربيه فى حدود 90 او 100 الف
لكن فى غيرى بيقول عادى - دى ازواق بقى وحريه شخصيه-
وياريت تحددى اكتر ايه احتياجاتك
لاحظى ان العربيه المفروض تبصيلها من عدة زوايا
مثلا العمر الافتراضى
قطع الغيار
سعر اعادة البيع
الماتور لو حد بيحب الجرى
الشكل
اوبشنز الرفاهيه
ومفيش عربيه فيها كل الحاجات دى لازم هتتنازلى عن حاجات وهتفضلى حاجات
فانت لازم تحددى اولوياتك
ويارب اكون افدتك