[alref]

السلام عليكم و رحمة الله و بركاته

اول حاجة الف حمد لله علي سلامة الوالدة
و ياريت لو تديني رقم تليفونك علشان اكلمك او اجيلك اطمن عليها

بالنسبة لجهاز الرنين..انا مش عارف الجهاز اللي حصلت فيه الحادثة قوته كام..بس هحاول اشرحلك بسرعة ايه اللي بيحصل في الرنين
الرنين دا مش اشعة..دا تكنولوجيا بتعتمد علي تكوين مجال مغناطيسي قوي جدا حوالين جسم المريض و بعدين بيتم التصوير بأسلوب معقد شوية مفيش هنا مجال لشرح

المهم قوة جهاز الرنين بتتحدد برقم اسمه "تيسلا"
و الأجهزة تبدأ من ربع تسلا لحد 3 تسلا
و علشان نتصور قوة التيسلا دي اد ايه كفاية اقولك ان قوة الجاذبية الأرضية اضعف من التيسلا بمراحل رهيبة

يعني لو الجهاز دا قوته واحد تيسلا يعني اقوي من الجاذبية الأرضية مئات المرات
طبعا دا لو في اي حاجة معدنية في مجال جذب الجهاز هتتحرك زي الطلقة
الأطباء لما بيدخلوا غرفة الرنين (و الجهاز مش شغال) لازم يسيبوا الموبايلات و الساعات برا الغرفة..علشان كلها هتبوظ من المغنطة الجامدة..

يبقي في احتمال ان في حاجة معدنية فعلا هي اللي خبطت الوالدة..و دا يعتبر جزء من الأهمال من الممرضة (لو كلامها صح)
و ممكن يكون راسها خبطت في حاجة اسمها الكويل..و دا جزء من الجهاز بيحوط المنطقة المراد فحصها علشان يستقبل الأشارات اللي جاية من الجسم

لو كانت بتعمل رنين علي المخ يبقي لازم يتحط الجزء دا عند الرأس
انما لو بتعمل علي الفقرات في الغالب مش هيكون في حاجة عند الرأس

ارجو اني اكون وضحت جزء بسيط من الصورة..و انا معاك في اي استفسار

و يا ريت تطمنا حصل ايه