رد: استفسار مهم
سيدى الفاضل / دكتور محمد
اللى حصل ده بالتمام والكمال حصل معايا فى الساجا بتاعتى.... خبطت فى رصيف بس سرعتى كانت عالية شويه وفوجئت بالايرباجلافتحت فى وشى وتسببت ليا فى حروق شديدة على الذراعين الايمن والايسر....
المهم .....
رحت التوكيل أســــال بكام قالولى سته الاف ونصف شامل الايرباج وحزام الامان اللى اكيد باظ هو كمان وشامل مصنعية التركيب...
انا قلت شكرا ومش عاوز الايرباج دى تانى .... قصيت الايرباج وروحت لواحد بتاع فيبر وخليته لحملى مكان خروج الايرباج فى الدريكسيون ولا من شاف ولا من درى....
لمبه الايرباج هتفضل منوره فى التابلوه ؟؟؟ ايوا طبعا وحلها بسيط جدا...افتح الغطا اللى فى شمال التابلوه هتلاقى جواه علبه فيوزات.....
هتعرف انهى فيوز بتاع الايرباج من خلال الغطا بتاع العلبه نفسه هتلاقى عليه رسم كروكى يوضحلك اى فيوز يخص الايرباج وبالتالى هتشيله من مكانه واللمبه هتطفى فى التابلوه منعا للمزاوله...
والرأى فى الاول وفى الاخر ليك ... يا إما تمشى بيها كده بعد ماتعمل اللى قلتلك عليه يإما تروح التوكيل وهما هيغيروهالك هى والحزام لان الحزام مرتبط بالايرباج وبيقف اما الايرباج تفتح.....
خلى بالك لو رحت التوكيل بالمنظر ده هيتسجل فى ملف العربية انها عاملة حادثه قبل كده وهتوقفلك بيعها لو حبيت تبيع بعد كده.....دا غير إن أى عيب صناعه هيظهر فى العربية بعد كده هيقولوك من الحادثة احنا اسفين انت خرجت من الضمان.....
قدامك حل من الاتنين
يا اما تركب طارة استعمال سليمه ومن غير كبسوله ولا سينسورات الايرباج وقدر تكمل ضمان العربية عادى جدا
با إما تعمل اللى نصحتك بيه وتنسى التوكيل نهائى ...
انا عن نفسى خلعت من التوكيل مع ان ساجتى عاملة 5200 كم فقط لكن السبب هو الاسعار المبالغ فيها جدا جدا....مكتوب فى جدول صيانه الساجة ان تكلفة 5000 كم هتبقى 345 جم ( زيت وفلتر زيت) فى حين إنى عملتها فى محطة محترمة بفلتر زيت اللانسر وكلفتنى 150 جم زيت وفلتر والراجل رقص بيهم كمان
لو عاوز حد بتاع قطع غيار استعمال للساجا قولى وانا اديلك رقم ة...هو فى اسكندرية و مغلوانى شويه بس مش زى التوكيل طبعا .... الطارة بس بالف ومائتين جنيها من غير الكبسولة ...ومغلوانى لانه عارف ان مفيش غيره جاب العربية دى متقطعه قبل كده.
ياريت ياريت ياريت ترد عليا وتقولى قررت ايه وعملت ايع
أخوك محمد عبد المجيد
الاسكندرية
ساجا - أبيض - أوتو - 5200 كم فقط
__________________
مع خالص الدعاء من الفؤاد بدوام النعمه والفضل من الله تعالى. وأن يهديكم لما فيه خير لكم ولسيارتكم وأن يحفظكم ويحفظ ما وهبكم من كل شر وسوء ومن كل نفس أثمه ومن كل عين حاسدة. وأن يكتب لكم حسنه فى كل خطوة تخطوها بسيارتكم ويحط بها من ذنوبكم. وقدر الله لكم وكتب عليكم فعل الخير وراحة البال والغنى عن السؤال.
محمد عبد المجيد المشتريات الخارجية شركة الاسكندرية للإضافات البترولية ( اكبــــا)
0116007025
|