[Rania Elhoseny]

كتبت هذه النصائح بلغة عامية بسيطة حتى تكون متاحية للجميع


لأنها بالفعل هامة.. ويجب مراعاتها عند قيادة السيارة

1- عند ركوبك السيارة ، عاملها وفقا لطبيعتها ..... يعني .

عامل السيارة علي أد الموتور بتاعها .. زي ما أحنا بنقول عامل الناس علي قدر عقولهم .

يعني مثلا واحد راكب سيارة موديل 84 وبيجري بيها علي الطريق ميه وميه عشرين . وبيقرص عليها في الملفات . ومش راحمها .

طبعا ده غلط ،، أي عربية موديل قديم ،، بتكون عايزه المسايسة . براحه عليها . تزود بنزين واحدة واحدة .
براحه عليها في الملفات ، عشان العفشة ....العفشة هي( الجزء الاسفل من العربية الذي يربط بين هيكل السيارة والعجل ...مساعدين ومقصات وحاجات كده مش عارفها كلها..

يارب أكون قدرت أوضح النقطة دي ...خلاصتها . حس بالعربية اللي انته راكبها لأن مش كل العربيات زي بعض .

كل عربية وليها طاقه معينه فلا تعطيها فوق طاقتها ...... عشان ماتعملش معاك النقص . وتعطل منك .



2- أحذر الطرق الجديدة

ولا أقصد هنا الطرق الجديدة اللي لسه متسفلته ،، لأ أنا أقصد الطرق اللي حضرتك أول مرة تمشي عليها .

يعني مثلا أنت أول مرة تروح الغردقة وماشي علي الطريق بتاعها بعربيتك ،، فلازم تكون حذر جدا وماشي براحتك ،، لأنك مش عارف الملفات شكلها عامل أزاي . ماتعرفش في مطبات ولا لأ وماتعرفش في كمين .ولا أيه برضوه .

وعلي فكرة أنا مره حصلتلي حادثة بسبب الموضوع ده بس انا مش اللي كنت سايق .

رايح فرح في قرية تبع بلبيس مع واحد صاحبي في العربية . علي طريق معفن جدا . أسمه طريق سندنهور تبع بلبيس . ومرة واحدة نلاقي ملف غبي جدا ....وراحت العربية نازلة متفسحه في الارض الزراعية ...وكان يوم منيل بستين نيلة . وجرينا ندور علي جرار يسحب العربية ،، وكنا لابسين بدل بأه ومصففين شعرنا .. اتبهدلنا بقينا ميكانيكة ...

فخد بالك يا جميل من الطرق اللي أول مرة تسوق فيها .




3- أحذر غرز اليمين .

يعني غرزة أصلا . الغرزة هي كلمة أعتادنا عليها ،، لما تيجي تعدي عربية قدامك . وتحود بشكل مبالغ فيه .

زي مرة كنت رااكب عربية أجرة بيجو ،،والظاهر عليها كان السواق مظبطها حبتين . ولما الظابط مسكه رادار ،، راح بيقؤله :: ماشيلي تعبان بين العربيات .

هات رخصتك ياحبيبي .

الغرزة اليمن بأه مصيبه ، يعني تفادي عربية وتاخد الحوده علي اليمين .

فممكن تيجي تاخد ال turn تلاقي بأه مثلا عربية نقل راكنه ،، تلاقي عربية كارو ماشيه .. يبأه كده كده هتلبس .

لأنك وقعت في كماشة مابين العربية اللي بتعديها ،، والعربية اللي لقيتها قدامك مرة واحدة .
وبيحصل حوادث كتير جدا نتيجة للموضوع ده .


4- أوعي تسوق وانت مش نايم كويس أو مرهق أرهاق شديد .

لأنك ياحلو ممكن تغفل غضب عنك ،، خصوصا لو الطريق طويل . ممكن تعالج الموضوع ده أنك تتكلم مع اللي جمبك . أو توقف وتغسل دماغك . أو تشرب قهوة .

5- الاسترخاء أثناء القيادة

أحيانا بشوف ناس راكبة العربية ومتشنجين جدا علي طارة القيادة وماسيكها بأيده الاتنين زي بيكون بيتخانق معاها . وبالذات النساء بتعمل كده .

لأ خالص خليك هادئ ومركز .... هادي ومركز ....هادي ومركز .

خليك كووول .


6- المرايات ،، طبعا كلنا عارفينها ،، الودان دي اللي بتبأه موجود في العربية .

لما تيجي تحود أو تاخد ملف أو تضرب فرامل لازم يكون عينك علي المرايات .

7- الفتحات الجانبية

بيضايقني جدا الناس اللي تدخل في فتحات جانبية وياخد الملف علي الواسع قووووي . ( زي مابيقولوا بيلف عربية نقل)

لما تيجي تلف في الاتجاه المعاكس عن طريق فتحة جانبية . لف بحيث أنك تكون بعد ما تلف بمحاذاة الرصيف .

عشان لو في عربية جاية ما تلبسش فيك ......منقول