فعلا في السيارات الحديثة نسبيا مباش فيه حاجة للتسخين، وزي ما اتقال كل اللي محتاجه مجرد 20-30 ثانية عشان الزيت يمشي في الموتور، وبعدين تمشي بالراحة حبتين لحد ما الموتور يسخن، وبعدها اعمل اللي انت عايزه
فس فيه مشكلة منتشرة في مصر بالذات
لما تروح عند ميكانيكي بسبب إن العربية سخنت شوية، أول حاجة بيعملها إنه يرمي الثرموستات، الميكانيكي ده بكل بساطة حطك على أول خطوة في هلاك عربيتك
هو إيه الثرموستات ده؟؟ مش هو ده اللي بيشغل المروحة؟؟
لأ..... ده عبارة عن بلف موجود بين الموتور والرادياتير، مهمته إنه يخلي الموتور محافظ على درجة حرارة التشغيل المناسبة طول ما الموتور شغال
وطب وهي تفرق في إيه؟؟؟ مش المفروض الموتور يبقى بارد أحسن؟؟
لأ برضو.... درجة حرارة الموتور زي درجة حرارة جسم الإنسان... لو زادت أو نقصت يبقى فيه حاجة غلط،
طب سخن وعارفين إنه غلط.... إيه الغلط في إن الموتور يبقى بارد؟؟؟
هو فيه مشكلتين:
1- الموتور البارد بيخلي الوقود ما يتحرقش كويس، فالقوة اللي بتطلع من الموتور حتبقى أقل، وده حيزود استهلاك الوقود
2- الموتور البارد مقاساته الداخلية مابتبقاش مضبوطة، لأن الموتور مقاساته متظبطة على درجة الحرارة بتاعة التشغيل، والموتور متكون من معادن بتتمدد بالحرارة وتنكمش بالبرودة، وده معناه إنه حيحصل احتكاك عالي جوة الشمايز مع البساتم بيخللي الموتور يفوت
طب إزاي الثرموستات بيخللي المشاكل دي ما تحصلش؟؟
لما بتشغل العربية الصبح بتبقى باردة جدا... فالثرموستات بيفصل مياه التبريد اللي جوه الموتور عن الرادياتير، وكده الموتور حيسخن بسرعة قوي
Cooling System - Warm2.jpg
ولما الموتور يسخن ودرجة حرارة الميه فيه توصل درجة الحرارة المناسبة للتشغيل يبدأ الثرموستات يفتح السكة للميه تروح الرادياتير عشان تبرد، وبكده العربية ما تسخنش، ولو العربية بردت الثرموستات حيقفا تاني، وهكذا
Cooling System - Hot2.jpg
طب لو الثرموستات ده مش موجود.. إيه اللي حيحصل؟؟؟
لو الثرموستات ده مش موجود، العربية حتاخد وقت كبير قوي عشان تسخن، ولو انت ماشي في طريق سريع في الشتا.. عربيتك ممكن تبرد، ويمكن تقطّع منك وانت ماشي كإنك لسه مشغلها الصبح.
باختصار الثرموستات ده عامل زي لما بتلبس جاكت في الشتا أو تلبس نص كم في الصيف