عربية تقيلة ولا خفيفة؟؟؟ طبعا الخفيفة أحسن
الكلام اللي حقولو ده يمكن يخلى ناس كتيرة تستغرب، بس فعلا العربية الخفيفة أحسن؟؟؟ بس أحسن في إيه؟؟؟
الناس عادة بتقول العربية دي تقيلة، بتقولها بطريقة كإنها مدح، المشكلة إننا لما بنقول التقيلة أحسن مش بنحدد، احنا سمعناها كده وخلاص.
المهم، فيه فرق كبير بين عربية تقيلة وعربية متزنة (أو موزونة على الطريق)، العربية التقيلة يعني وزنها كبير، إنما العربية الموزونة دي ممكن أوي تبقى عربية خفيفة، بس الرك على التصميم بتاعها.
خليني أوضح أكتر:
العربية التقيلة (اللي وزنها تقيل يعني) بتستهلك بنزين كتير عشان تتحرك، وصعب السيطرة عليها لو عايز تفرمل، فكر كده في الفرق بين عربية صغيرة وأوتوبيس (طبعا الفرق كبير بس ده للتوضيح بس)
أهم حاجة في اتزان العربية هو توزيع الوزن، مش كمية الوزن... وكل ما كان الوزن متركز في الأرضية كانت العربية موزونة أكثر، عشان كده العربيات الاسبور بتبقى واطية وعريضة عشان تثبت على الطريق، ولو اتكلمنا على العربيات العادية بتاعتنا، يبقى العربيات 4×4 دي مش ثابتة خالص.
وكمان الوزن لازم يبقى متوزع بالتساوي بين الأمام والخلف، جرب كده تسوق عربيتك وهي فاضية أو وهي محملة ناس ورا أو حاطط حاجة تقيلة في الشنطة، أكيد لو حتاخد غرزة العربية حتعوم منك، أو على الأقل رد فعلها مش حيبقى زي ما انت متعود.
أكيد فيه حاجات تانية بتأثر في ثبات العربية، بس كل حاجة وليها حاجة.... حكلمكو عليها بعدين
|