[dr_mim81]

المشاركة الأصلية كتبت بواسطة مهند النجار دة موضوع عنها ارجو انه يفيدك من حوالي اسبوع جاتلي الفرصة اني أسوق عربيتين X-trail...عشان كان لازم أودي واحده من مكان الشركة للموقع و أرجع التانية اللي في الموقع للشركة العربية الأولي كانت عاملة 593 كم....يعني زيرو و لسه دي تعتبر أول طالعة ليها....عشان كانت قبل كده ماشية في الترخيص و التأمين و الذي منه... العربية الثانية كانت ماشية 8760 كم يعني اتلينت و بقت زي الفل مجموع اللي مشيته بيهم حوالي 30 كم داخل التجمع الخامس الإنطباع الأول عن السيارة من الخارج انها قوية و تصميمها جيد و متناسق...و معزز بوجود جنوط و كاوتشات كبيرة....مما يعطيك الإحساس بانها قادرة علي الدخول في الصحراء بدون خوف! أول ما تدخل العربية تفاجأ بالفقر و عدم التكلف في الخامات...و احساس البلاستيك الطاغي علي المقصورة...و ده واضح جدا في التابلوه و الجزء الأسفل من الأبواب.... عجبني في المقصورة كثرة أماكن التخزين و مواقعها...يعني مثلا استفادوا من الفراغ اللي قدام السوق و عملوا درج حلو....بعكس الياريس و الماتريكس...فراغ عجبني جدا بردو فتحة تكييف أمام السواق خلف عجلة القيادة...و دي بتوجه الهواء علطول في وش السواق....بس خد باللك لا تاخد برد جاي فيها سي دي\كاسيت كينوود اللي هو بيتجمع في مصر...ماجربتش أسمعه عشان ماكنتش فاهم فيه أي حاجة.. التكييف بتاعها أوتوماتيكي...و تبريده كويس جدا الكراسي كعادة الكراسي الجلد الخاصة بالسيارات المجمعة في مصر...ممتازة...و مريحة جدا. معجبنيش قعدة السواق...حسيت ان رجلي نازلة بزاوبية 90 و الدواسات تحتي علطول...يعني كنت قاعد مش مرتاح قوي نيجي بقي لاختبار القيادة....و انا تعمدت اني اجرب العربية في كل الظروف عشان يبقي تقييم شامل (الحمدلله مكانش فيه حد من الشركة معايا) ندور الموتور...هادئ جدا و ملهوش صوت....مع العلم انه 2500 سي سي بيطلع حوالي 177 حصان... دوسة البنزين بتخلي العربية تفط من مكانها و تفرك في الأرض...بس ده في الأول بس.... التسارع بتاعها عادي جدا جدا جدا....مش 2500 سي سي خالص...ممكن يكون 1800 أو 2000 بالعافية...و ده كان في العربيتين...حتي الكيك داون كان صوته عالي بس مش مديني اللي انا عايزه سرعة ال100 كانت علي 2000 RPM...و ده كويس جدا...بس مناسب للسي سي.... العفشة و الثبات و الفرامل: العفشة سيئة جدا جدا...بترزع بعنف شديد ...و علطول بتتنطت...يا ويلك لو نزلت في حفرة ولا بلاعة...العربية بحس انها بتفك من بعضها...الدركسيون كان فيه خبط في ايدي لو دخلت في طريق مكسر كأن في حاجة مفكوكة من تحت... ده غير ان الأبواب و التابلوه شغالين تزييق و تكتكة... جربت أعمل بيها مناورة علي سرعة 80....(حرف S)...كل اللي أقدر أقوله اني مقدرتش أكمل باقي الحرف....و حسيت اني ماشي بجمب العربية علي سرعة 100 انا حاسس اني ماشي بسرعة...و ده بسبب عدم استقرار العفشة و التنطيط المستمر بعدها بكام يوم ركبت مع سواق واحدة تانية بس كانت عاملة 39000 كم...و دخلنا بيها في الصحراء....حسيت اني راكب الملاهي و كانت بتعدي بصعوبة لو فيه حتة وعرة ده غير احساس التفكك و سالت السواق ايه رأيك فيها؟؟ قالي ولا ليها أي لازمة....هي منظر و تكييف و شوية كماليات...و موتور نوعا ما كويس...بس ماتعديش بيها 120....و ماتخشش بيها في الصحراء! ده باختصار تجربتي مع الXtrail...و حاولت علي قد ما أقدر اظهر أهم العيوب و المميزات في العربية http://www.youtube.com/watch?v=YspI96orDVM http://www.youtube.com/watch?v=O75wP...eature=related

يعني كدة رايك انها مش كويسة مع ان حضرتك قايلي في المشاركة اللي فاتت انها كويسة انا كدة احترت
انا كنت قريت نفس الرد دة في مكان تاني هو حضرتك اللي سوقتها لو يعني نقلة عن حد تاني علي اساس ان تجربة الواحد الخاصة افضل من السماع
وشكرا ليك مرة تانية