زي ما بنذكر السلبيات اللي بتقابلنا في حياتنا في أماكن خدمات عامة أو خاصة زي توكيلات السيارات ... أنا شايف إن لابد الواحد يقول كلمة حق لما يقابل ايجابيات والغرض واحد هو إفادة الجميع من التجارب السلبية والإيجابية
باختصار أنا اشتريت سيارتي الماتريكس مو2010 في 13/8/2009 وعملت بيها 25000كم حتى الآن والسيارة ماشية معايا كويس الحمد لله بس سحب البنزين زيادة شوية عشان اتوماتيك المهم اللي عاوز اقولوه ان كل المشاكل اللي قابلتني في العربية التوكيل حلهالي بسهولة ويسر سواء كان في مركز خدمة أبورواش أو قليوب
1- لما كنت عامل 10000كم تم تغيير ماكينة زجاج كهرباء وموتور مرايات الكهرباء مجانا
2- وجدت صوت طقطقة ظهر معايا في العجلة الامامية يمين من حوالى شهرين والعداد كان عامل حوالي 23000كم طبعا كل اصحابي قالولي البس يا معلم
ده كوبلن والحاجات دي هيعتبروها في التوكيل مستهلكات في العفشة طالما عديت العشرين الف وهتغرم دم قلبك في تغييرها... المهم حجزت موعد صيانة بالتليفون (بالمناسبة الصيانة 7 أيام في الأسبوع من 8:30ص الى 5م) وذهبت للتوكيل وقولتلهم على العطل وقولتلهم صوت الموتور والسحب والفرامل وخلافه ... غيرولي بطاحة مساعد يمين ورجلشوا الفرامل ونظفوا البخاخات وكشفوا على المياه والزيت كل ده مجانا ...
3- امبارح لقيت العربية مش بتدور معايا
... اتاري البطارية تعيشوا انتو ... قولت مش وقتك خالص احنا في ايام بنسال الله حق النشوق ... وامتحانات وثورة واسعار غالية .... المهم انهارده الصبح قولت اشوف على النت ايه احسن انواع واسعار واماكن بيع ... جه في بالي اسال التوكيل من باب العلم بالشيء اتصلت بخدمة العملاء 16101 وطلبت الاستفسار عن قطع الغيار ... واذ ربةً الاقيهم بيقولولي ضمان البطارية سنتين أو 40 الف كم
كنت هارقص من الفرحة
... وقمت صليت الظهر ونازل رايح عليهم في قليوب وصلت عندهم الساعة 1:15ظ ومن غير ما احجز ميعاد صيانة وغيرولي البطارية بواحدة جافة 55أمبير ومن فرحتي قولت لازم اكتب الموضوع ده كشهادة حق ... وعقبال عنكم جميعا ...
