المشاركة الأصلية كتبت بواسطة mido-spicy
بص يا دوك بصرف النظر عن مواصفات العربية اللى حضرتك عايزها ولو رجعنا لسؤالك الاصلى
الجديد ولا المستعمل
كل حاجه وليها ميزه وعيب
وزى حسام البورسعيدى ما قالك الفلوس اللى معاك او اللى هترميها فى العربيه هى اللى هتحدد انت هتجيب ايه
فلو بدانا بالمميزات والعيوب
اولا المستعمل احسن من الجديد فى ان 99 % من المستعمل ماحدش بيقسطه ... لازم كاش فبناء عليه لو هنقارن بين مستعمل كاش وجديد قسط لا يبقى المستعمل الكاش يكسب
لان الجديد القسط عليه حظر بيع واقساط لازم تتدفع يوم 1 فى الشهر ولو مادفعتش هتلاقى البنك بيكلمك هات فلوسنا وكمان اشتراك شركه التامين طول فتره التقسيط واللى اغلبعهم حراميه ومابتستفدش منهم بحاجه .. دا غير طبعا مبلغ الفايده الل بيوصل ل 50 % من مبلغ العربيه
دا غير انك بتقول انك لسه بتتعلم السواقه جديد ... يعنى وارد لقلة خبرتك بالسواقه انها تتخبط منك وخبطة الجديد وحش قوى فى زعله
يعنى الجديد القسط خراب من كل حته ...
اما عن مميزات الجديد انك اول يد بتستعمل العربيه وتحافظ عليها
دا غير انك مش هتحتاج انك تفتح حتى كبوت العربيه علشان تغير ميه الريداتير لمده سنه على الاقل
طبعا هتتمتع بالتكنولوجيا الجديده وفخامة العربية اللى ممكن ماتلاقيهاش فى القديم
طيب ... لو قلنا انك معاك مثلا ثمن الجديد كاش علشان نتجنب موضوع القسط وقرفه
هنا بقى هيتدخل المبلغ فى التحديد
يعنى مثلا لو معاك من 60 الى 70 الف ففى الحاله دى هتشترى لانوس جديد
طيب لو حبينا نحط الرقم دا فى مستعمل
هتلاقى نفسك ممكن تشترى عربية لانسر مثلا 99 بـ 45 الف وتظبطها كمان بـ 5 الاف وتلاقى نفسك راكب لانسر مش لانوس
او حتى حته جولف 4 بنفس المبلغ تقريبا بتاع اللانسر
يبقى لانوس ولا جولف 4 و لانسر ؟؟؟
انما بقى لو معاك 80 او 90 الف هقولك لا طبعا الجديد يكسب لانك ساعتها هتفكر فى صنى نيسان او نيو اكسنت وفى الحاله دى هما اللى هيكسبوا
انا مش هديك رد محدد علشان مابقاش بوجهك ... انما انا اديتك عيوب ومزايا كل حاجه ولك الاختيار
ارجوا انى اكون افادتك
|
الف شكر يا جميل و ربنا يخليك كده و اسالك علطول
بص هو انا متفق معاك فى القسط لانه هيبقى كسر رقبه بس برده انا خايف من المستعمل لان انا مشغول 24 ساعه فلو عطلت مني هكتئب منها و مش هاجي جمبها و لا هبقى فاضى اصلحها و فى نفس الوقت السوق دلوقتى تقريبا اسعاره عاليه فمش عارف استني شهر كده و لا ايه
و فى نفس الوقت انا كل فترة بحب اشترى احدث اجهزة علاج طبيعي بتنزل فمش هبقى قادر اشترى غيرها فبقول خليني فى الجديد و انا كده كده على قدى مش بتاع جري يعني اخرى انى اخلص شغلى و ارجع او سفر بس على سرعات متوسطه فربنا يستر و متتخبطش لان بصراحه انا اكتر حاجه انا خايف منها انى اشترى عربية مستعمله و كمان اطلع اتخميت فيها و تطلع مقلب و كمان مقدرش ابيعها او اخسر فيها النص ده الى هتبقى كسر رقبه بجد فخلينا فترة الشهر الى هيبقى فيها تعليم ده و بعدها لما اطلع الرخصه ابقي ااجر بحيث اخد شوية خبرة و اتعود قبل ما اشترى
اما بلنسبه لقصة التقسيط ففى واحد قريبي اشترى افيو و دفع 10 مقدم و قسط الباقى على 7 سنين و الى انا شايفه بجد تهريج افضل ادفع فى تمنها 7 سنين حرام يعني هيبقى كتير اوى
فانا لو هدفع و هجيب تقسيط هيبقى انى ادفع مثلا 50 او 60 و اقسط الباقى على سنه
ولا انته رايك ايه ؟ اسف للاطالة