رد: قبل أن تشتري اسبيرانزا - احذر!
تحياتي لكل اللي اتكلموا في الموضوع ده
واضح ان فيه سخونه في الحوار
والسخونه دي اجبرتنا كلنا اننا نقرأه من الجلده للجلده
وانا شخصياً بضم صوتي لصوت المدافعين عن العربيه دي
لأن المشكله اللي حصلت مع الأخ صاحب الموضوع فيها تقصير من جانبه لحظه شراءه للسياره
وجايز جدا العربيه دي يكون اتعمل بيها حادث أو اكله مطب عالي وهم بيرفعوها في معرض ولا حاجه
انما صعب قوي اصدق ان ده كلام ينطبق على كل العربيات اللي زيها
لأني بشوفها في الشارع وفي طرق السفر ، وفي السوق ماسكه سعرها (موديل 2006 ب50)
فمع تقديري للمعاناة اللي قابلها
واللي يا رب ما حد فينا يشوفها في أي عربيه
بس وارد قوي ان دي تكون مشكلة فرديه ، مش عامة
خصوصاً ان الصين لسه مش مطبقة quality control كويس ، انما انا سمعت بالفعل ان التجميع المصري تجاوز كثير من المشاكل اللي واجهها جيل الرواد من مشتري العربيه اسبيرانزا
على اي حال
زي ما قال المحترم ابو نورا ( الخلاف في الصاج لا يفسد للود قضيه )
ويجعله عامر علينا كلنا
ويا ريت نحاول نلتمس لبعض الأعذار ، وبلاش نقف لبعض ع الكلمه ، عشان في الآخر كلنا اخوات في الهم والوطن ، وكلنا داخلين هنا عشان نتبادل خبراتنا ومعلوماتنا
انا شخصيا بعترف ان معلوماتي في السيارات كانت زي معلوماتي عن الهيروغليفي ، وبصراحه المنتدي ده ثقفني جامد قوي في المواضيع الخاصه بالسيارات
تقبلوا جميعا حبي واحترامي
" ولا تنازعوا فتفشلوا وتذهب ريحكم"
|