رد: عاوز تتأكد أنك من جيل التسعينات ؟
أقولك انا بقى على ذكريات طفولة الثمانينات :
- اولا : التليفزين كان بيشتغل فترتين فقط
- برنامج جولة الكاميرا كل يوم حد بعد مسلسل 7.15
- برامج العلم والايمان وعالم البحار كانوا غاية فى الثقافة .
- الفيلم الاجنبى بتاع نادى السينما يوم السبت او أوسكار يوم الخميس وياسلام بقى لو فيلم الفك المفترس باجزاءه التلاته .
- حلقات ماكجيفر او نايت رايدر او الرجل الاخضر
- المسلسل الاذاعى على محطة مصر يوميا 5.15
- برامج الاطفال : سينما الاطفال ( ماما عفاف الهلاوى ) صباح يوم الجمعه وياسلام لو حلقه الكلبة لاسى
برنامج بابا ماجد عبدالرازق ع القناة التانيه ، وماما نجوى وماما ساميه وطبعا غنوة وحدوتة مع ابلة فضيلة فى الراديو
( طبعا لما جت ماما سوزان قفلت على كل المهمهات دول )
الاذاعة :
أغرب القضايا واشهر مزيكا مرعبه
وبرنامج سبعه سبعه واربعين ميه وعشرين اذاعه ويطلع عينك عشان تتصل تقول الحل والجايزة عشرة جنيه ( على فكرة ماكنش فيه تليفون وكنا نروح نتصل من عند البقال اللى ع الناصية )
الاغانى :
طبعا قنبلة زمانه : على حميده ورائعته "لولاكى "
المجلات :
طبعا ميكى وسمير ، والشاطر اللى يجيب ميكى جيب ويحل الالغاز بتاعتها ياههههههههههه .
لعب الكورة فى رمضان بعد مانشوف فوازير فطوطة او الخاطبه وماكنش فيه غير مسلسل واحد فقط فى رمضان رافت الهجان او ليلى الحلمية .
والمفاجأة : المصروف اليومى 10 قروش كان بيجيب علبة جيلاتى كيمو ( علبه صغنونة قد فنجان القهوة ) بشلن وبعدين كوز درة مشوى بشلن .
ولا العاب الشارع : سبعاوية ، تريك تراك ، عنكب ، صيادين السمك ومساكة الملك
قول ايه ولا ايه ولا ايه على اسعد ايام الحياة .
__________________
Mohamed Bendary
اللهم فرغنى لما خلقتنى له ولا تشغلنى بما خلقته لى
اللهم ولا تحرمنى وانا أسألك ولا تعذبنى وانا استغفرك
مصر هاتفضل غاليه عليا
|