[AbOnOrA]

اهلاً بيك يا استاذ قناوى فى مصر موتورز ويارب مشكلتك تخلص فى اسرع وقت وتستمتع بعربيتك

انا بس ارجو ان حضرتك تهداء (وانا عازرك فى انفعالك ) علشان ان شاء الله تاخد حقك واحنا كمان نفهم ويمكن نقدر نساعدك لان الحمد لله المنتدى على شهرة كبيره وكل التوكيلات بما فيهم غبور ليهم ممثلين هنا ونقدر نضغط عليهم لمتابعة وحل مشكلتك زى ما حصل مع توكيلات تانية فى السابق

فصلى بينا على النبى (عليه افضل الصلاة والسلام) واحكيلى واحدة واحدة كده كل حاجة بإمانة وانا اوعدك ان مشكلتك توصل للتوكيل ولهيونداى كورياً نفسها كمان لو لزم الامر


اولاً كل اللى حضرتك قولته لحد دلوقتى ميعبش الوكيل فى اى حاجة لانك كده بتتكلم عن عيب صناعة مش عيب فى الخدمة واى عربيه فى الدنيا من اول المرسيدس وانت نازل وارد تنزل واحدة بعيوب صناعة اللى يهمنا هو اللى التوكيل هيعمله لتعويضك عن العيب ده وضياع وقتك وحرقة دمك واللى انا فاهمة ان العربيه لسه بتبص عليها فى التوكيل ومفيش تفاصيل واضحة من اسبوع لدلوقتى

فانا بطلب من حضرتك تعمل سكان لجوب العربيه او اى مستند اخدته من التوكيل يفيد استلامة للعربيه وما بها من عيوب وتفاصيلها (نمر العربيه - رقم شاسية ...)

2. تحكيلنا بالراحة كده ايه طبيعة وشكل المشكلة او المشكلتين اللى قولت عليهم وظهرو ازاى وهل انت اشتريت العربيه من التوكيل مباشرة ولا من معرض ؟

3. اسماء المهندسين اللى حضرتك تعاملت معاهم فى التوكيل ومدى رضائك عنهم وتوضيح لكلامك عن انها شغالة تاكسى او حاجة كده مش فاهم بصراحة !!!

وانا اوعدك بمجرد اثبات جدية المشكلة اتابع معاك ومع التوكيل مباشره ان شاء نوصلها لكيا نفسها زى ما قولتك وده وعد والتزام جاد من إدارة مصر موتورز تجاه مستهلكى السيارات عموماً اللى هما اساس مجتمع السيارات

لكن لا سمح الله فيه بعض الناس بتخش ساعات لتختلق قصص وهمية لتشويه صورة وكيل على حساب اخر باستخدام المواقع الالكترونية والمنتديات وطبعاً احنا مش ممكن نسمح بإستغلال موقعنا لحملة من حد ضد حد فلازم يكون الكلام موثق وبالجدية الكافية علشان احنا كمان نقدر نتعامل بالجدية والثقة فى مطالباتنا للتوكيل

فى انتظار رد حضرتك