[د0تامر محمد]

-28-
ذهبت انا ورشدى لمقابله المقدم سعيد00
وبعد الترحاب قال:
-حمد الله على السلامه يا رشدى
-الله يسلمك
-دلوقتى يا بطل ح أعرض عليك شوية صور لناس مشتبه بيهم ممكن الاخ عادل يأجر واحد منهم عشان يقتلك
وعرض عليه الصور ولكن لم يتعرف على واحد منهم!
قلت:
-تفتكر ليه اللى حاول يقتل رشدى وياخد العربيه اكتفى بخبطه على راسه
قال:
-أكيد فيه حاجه منعته من تنفيذ مخططه00
هما كانوا على الطريق وهو استغل لحظه مناسبه وظهر طارىء خلاه ميكملش او خاف
قال رشدى:
-كلام سعادتك صحيح لانى فى المرايه لمحت الشر فى عين الراجل لكن ملحقتش اتفادى الخبطه
قال:
-المهم دلوقتى عايزينك توصل للراجل اللى عمل كده00 وانا ح أجيب لك رسام توصف له ملامح الراجل بدقه عشان نحاول نكون له شكل قريب 00تتعرف عليه لما نجيب اللى يشبهوه
رشدى:
-انا جاهز سعادتك بس يا رب تلاقوه
قلت:
-ايه اخبار عادل سعادتك ؟
قال:
-البيه مشرف عندنا 00 وفى انتظار تقرير الطبيب الشرعى
قلت:
- فى امل لأدانته ؟
- قال:
-بالتأكيد 00بس لو طلع اللى فى بالى صحيح مش ح نحتاج مجهود للاثبات 0
قلت :
- ربنا يوفق سعادتك
وتم استدعاء الرسام واخذ رشدى يصف له ملامح الرجل وكأنه جالسا امامه
ذهبنا الى بيت هشام وكان بسام عنده
بادرنا هشام :
-عملتو ايه؟
قلت:
-للاسف رشدى ما اتعرفش على حد
قال رشدى :
- والله ما اسيب اللى عمل فيا كده
قال بسام:
- كلنا لازم نفكر فى حل لمشكلتك يا رشدى
جلسنا 00فقلت:
- انا لازم اتصل بحسن 00انا كنت نسيته رشدى:
-استنا بكره تكون العربيه خلصت من شوية الشغل اللى فيها
قال هشام:
- والله حرام تصرف عليها جنيه
رشدى:
- كل جنيه صرفته ح دفعه لحسن
قلت:
- والله انا لحد دلوقتى مش مصدق انك بينا
هشام:
- تصدق لن احنا كان عندنا احساس انك راجع
رشدى :
- انا كده بسبع ارواح زى القطط
بسام :
- والله زمان لمتنا يا شباب
قلت:
- الحمد لله ان ربنا جمعنا من غير شر
رشدى:
- زى ما قال بسام احنا لازم نعمل خطه 00انا راجع سخن يا جدعان
قلت :
-اول حاجه موضوع حسن
هشام :
-وتانى حاجه عادل وتارنا معاه
رشدى:
-وتالت حاجه انتوا
قلت متسائلا:
-احنا؟!
رشدى:
-طبعا00لازم أعوضكم عن العذاب اللى شفوته بسببى
قال هشام:
-يعنى ح تعمل ايه؟
رشدى:
-عزومه اسبوع
هشام:
-لا00لالا00 دى جامدة جدا
رشدى:
-اسبوع مصيف كامل على حسابى
قلت:
-انت عيان ولا ايه؟
رشدى:
-انا فى كامل قواى العقليه والجسديه
هشام:
-هما عملوا ايه فى دماغك
رشدى:
-دماغى زى ما هيه
ما انا قلت لكم ح أدفع حسن كل مليم صرفته لكن نسيت اقول وكل مليم ح اصرفه
وضحكنا 00فرشدى هو رشدى!
(تتبع)