محتار بين نيسان صني و دايهاتسو سيريون 1500
سلام عليكم
انا بفكر في شراء عربية بس محتار لأني عايز اجيب حاجة كويسة مقابل الفلوس ومرجعش اندم أشد الندم بعد كدة
انا محتاج اسافر من والي الغردقة شبة اسبوعي وأخري 100 الف جنيه بالعافية وكنت عايز اعرف ايه احسن عربية اقدر اشتريها بالسعر دة:
طلباتي موش كتير خالص - كل اللي انا عايزه هو:
1) تكون ياباني او اوروبي 100% إذا أمكن
2) موفرة في البنزين
3) مريحة للطوال اللي زيي
4) أوتوماتيك
5) شنطة كويسة (موش لازم حاجة كبيرة اوي بس تشيل)
6) تستحمل المطبات والطرق الرديئة
7) ثابتة في الطريق على السرعات العالية
8) مدفعش فيها كتير بعد ما اشتريها سواء للصيانة او بسبب مشاكل التصنيع - يعني اعتمادية عالية
موش ناوي ابيعها بعد ما اشتريها علشان كدة موش يهمني اوي سعر اعادة البيع وموش يهمني سعر قطع الغيار لأني كدة كدة بحب اجيب الحاجة النضيفة اللي تستحمل معايا وقت طويل وطبعاً الحاجة الياباني المفروض انها غالية شوية بس عمرها طويل ودة عز الطلب بالنسبة لي
فكرت شوية ولقيت قدامي نيسان صني ودايهاتسو سيريون 1500 سي سي سبور
الي عاجبني جداً في السيريون انها يابانية 100% بس اللي مضايقني شوية ان شنطتها اصغر من الصني وخايف من عندم احتمالها مشاوير السفر (علشان موتورها ال 1500 وصغر حجمها نسبياً) و عدم احتمالها الشوارع الرديئة والمطبات.
اللي مقلقني كتير من الصني انها متقفلة هنا وبصراحة موش عارف التقفيل دة نظامه ايه - انا معنديش ثقة في التقفيل المصري للأسف الشديد.
أرجو الإفادة منكم قبل قراء الشراء - ربنا يعوض تعبكم في الرد - شكراً
|