[AbOnOrA]

موضوع جميل وظريف ... قدرت تجمع بين الفكرة والنصيحة وخفة الدم والمفارقة

انا كنت زيك مهووس بالعربيات من صغرى برضو كانت اى لعبه تجيلى لازم الموتور اللى فيها يتطلع علشان ابداء تجاربى عليه طبعاً مواتير بحجارة بس كنت بحس بقمة المتعة اول لما اطلع الموتور واوصل السكين بالحجر القلم فيصدر الازيز المحبب ويشتغل ده غير الهوس بمصغرات العربيات الحديد بتاعة زمان ديه كانت إدمان ومازالت عندى
وفى مرحلة الاعدادى الى بداية الثانوى كنت حفظت عن ظهر قلب كل الماركات والموديلات وبداءت اكون قناعات بالاعجاب بانواع ورفض انواع تانية بس بناء على الشكل بس وفى بداية الثانوى قمت بمغامرة مهببة ومشيت بالعربيه (بعد سرقة المفاتيح) لوحدى حوالى 50 متر انتهت بحادثة دمرت عربيتين بس الحمد لله محدش حصلة حاجة بس على اثرها حرمت من انى اهوب ناحية العربيه لسنين بعدها جابتلى اكتئاب وزودت لهفتى على اقتناء واحدة
طبعاً اضطريت اتعلم السواقة خارج نطاق البيت وعربيه البيت فاتعلمت على عربيه واحد صاحبى سيات 131 برضو وكان الفتيس بتاعها بايظ كمان كانت فيها الاول وبعدين تجيب التالت على طول علشان التانى كان بعافيه شوية
واستمر الشغف والحب ده يزيد لحد ما ربنا رزقنى باول عربيه من جيبى
لكن مازال الشغف كما هو وبيتهئالى لو جبت كل عربيات الدنيا برضو هفضل احب العربيات واعتقد ده نفسه السبب فى اننا مش هنبطل نشتكى ونشكر ونعلق ونتمنى ونحب ونكره عربيات
مش لعدم الرضا بعربياتنا لكن لحبنا فى العربيات نفسها واهتمامنا بكل تفاصيلها