[m_elhdeny]

المشاركة الأصلية كتبت بواسطة 3bd0 يالنسبة للسفريات الطويلة، الحركة اللي حضرتك بتقول عليها دي انا مجربها وبتعمل شغل السحر بصراحة، بس المشكلة بقى ان بعد 5 دقايق (او على حسب انتا تعبان قد ايه) بتحس ان الهوا ده بدل ما يفوقك بدأ يسطلك ولازم ترجع تقفل الشباك عشان تفوق تاني. ساعات كمان ما بتقدرش تفتح الشباك خالص سواءا عشان سرعتك أو عشان في تيار هوا شديد برا، لو الهوا دخل هايطير كل حاجة في العربية. في الحالات دي لا بديل عن اللب والقهوة موضوع رجلك ده شفتو مع ناس كتير، بس بطرق وأشكال مختلفة. أنا أعتقد بيبقى طريقة مخك في تنظيم وتظبيط نفسه على العربية الجديدة، بيحاول يعرف حدوده يعني. يا راجل ده انتا مشفتنيش لما اجي اسوق أوتوماتك بعد فترة طويلة مانيوال أو العكس اللي راكب معايا بيعد يضحك عليا بس زي ما انتا قلت، كلها بتبقى 10 دقايق، يوم ما تكبر أوي يبقى أول مشوار، وخلاص سيستم المخ كلو بيتظبط بالنسبة لموضوع الجنس الناعم، أنا نفسي مرة كده أشوف واحدة سايقة مرجعة الكرسي لورا أوي و بتسوق بايد واحدة وقاعدة مستمتعة كده. دايما قاعدين على اعصابهم وعاوزين يخلصو من المشوار بأي طريقة هما بيدوسو على البنزين بعنف في الزحمة عشان بيخافو العربية تبطل، لو العربية بطلت بيتوترو جدا وبياخدوا وقت طويل عقبال ما يتصرفو، والناس طبعا ما بترحمش، وهما مش عاوزين كده طبعا. دي طبعا نظرية من تأليفي ممكن تكون صح أو غلط ، بس من كتر ما شفت منهم والله

شكرا ياباشا على النصيحة دى بس يامعلم لو حصل وهديت مرة واحدة او ودست فرامل يبقى القهوة خلاص شكرا مع السلامة
المشكلة بقى يامعلم انى معرفش اسوق لوحدى لازم يكون حد جنبى حتى لو مبيعرفش حاجة فى العربيات اهوة حد جنبى والسلام وموضوع العشر دقايق دا بيقلقنى جدا ببقى خايف احسن العربية تتخبط ولا يحصل فيها حاجة بس بعد العشر دقايق دى ببقى على طبيعتى تانى وبهدى خالص وممكن ارجع الكرسى لورا كمان
اما بقى بالنسبة لموضوع الانسات والسيدات فالموقف دا حصلى وانا لسة بتعلم ودخلت فى شارع ضيق والكلام دا من زمان اوى ومرة واحدة لاقيتلك عربية هيونداى اتوس فى وشى فاديت اشارة شمال وجيت على الجنب الشمال عشان هى تعدى والشارع ضيق اصلا ولاقيتلك مرة واحدة الرعبية الاتوس كل الانوار للى فيها اشتغلت ولولا ستر ربنا انها كانت ممورة العربية لان صوت موتور العربية كان حينفجر اصلا

المشاركة الأصلية كتبت بواسطة CARDIO يعنى الواحد يخش ينام يلاقى التعليقات و التريقه على البنات كده .. انا عارفه ان جزء من كلامكم صح و ده الى بيحصل مع ناس كتير بس اى حاجه فى الدنيا بتتعلمها بالممارسه الكتير و كل ما تتعلم بدرى بيكون احسن و ده اللى بيحصل مع الولاد و مش مع البنات .. بس ابقوا افتكروا ان تقريبا كل البنات اللى بتسوق بتبقى عوزه تروح الجامعه او تروح شغلها و بتجيب عيالها من المدرسه و بالمره تشترى شويه طلبات للبيت من غير بهدله المواصلات و بتبقى العربيه هى طوق النجاه من البهدله .. و هى لا اخدت مفتاح العربيه من باباها بعد زن طويل ( مش حقول من وراه) علشان تاخد بيها لفه و لا جربت تسوق عربيات اصحابها و عربيات القرايب كلهم و غالبا باباها و اخوها هم اللى مستوليين على العربيه معظم الوقت و لما تقول لحد علمنى يقول لها العربيه مش ناقصه او مش فاضيين.. و لا واخداها تعمل بيها غرز او امريكانى .. مااااااااااااااااشى

ههههههههههههههههههههههههه ههههههههه
هوة حد اتريق
(جبنا الكلام لنفسنا)

المشاركة الأصلية كتبت بواسطة m.elhasafy معلش النهاردة كان يوم شغل طحن بس علشان ما تقولوش إنى هربت ... حقولكم كده حكاية إفتكرتها: فى واحدة زميلة فى شركة بنتعامل معاها إتسرقت عربيتها بطريقة غريبة ... كانت راكنة العربية قريب من شغلنا و بعد ما رجعت بعد حوالى ساعتين علشان تمشى ركبت العربية و بتدور و لسه حاتطلع لقت واحد معدى بيقولها العربية بتدخن من الشكمان و إنه ميكانيكى و من خبرته الظاهر إن عندها مشكلة كبيرة ... فلما قالتله إنها مش شايفه قالها خلاص إنزلى بصى و أنا هزود بنزين ... و بمجرد ما ركب العربية: طبعاً فص ملح و داب و معاه (عربيتها جواها شنطتها جواها موبايلها و فلوسها و أوراقها) طبعاً رجعت لينا بتصوت قمنا إتصلنا برقمها فرد علينا الباشا و قالنا العربية فى الشارع الفلانى و قولوا للعبيطة اللى سابتلى العربية ما تعملش كده تانى طبعاً كل اللى أخده من العربية فلوسها و موبايلها ( طلع محترم: سابلها الأوراق و خط الموبايل) و حمدت ربنا ألف مرة إنه كان مستعجل لإن الأنسة كانت حطة شيكات خاصة بشركتها تساوى ثمن عشر عربيات فى الشماسة الدروس المستفادة: 1- مفتاح عربيتى لازق فى إيدى طالما سبت العربية ... ولو ثوانى 2- شنطتى لازقة فيا طالما خرجت من العربية ... ولو دقائق 3- مش أى حد غريب يقولى حاجة أصدقها ممكن أقوله شكراً و أخلى أى بواب أو سايس يزود بنزين و لو إحتجت حاجة أتصل بالميكانيكى بتاعى 4- الميكانيكية ما بيسرحوش و ليهم ورش بيشتغلوا فيها 5- واضح إنه كان موجود لما سابت العربية و إختمرت فى دماغة الفكرة ... حسبى الله و نعم الوكيل 6- ما أحطش شيكات الناس و شقاهم فى الشماسة ... يعنى الواحد يتقى ربنا شوية و تصبحوا على خير

ههههههههههههههههههههههههه هههههههههههههههههههههه
مش قادر امسك نفسى من الضحك والله
حركة جديدة وملعوبة

المشاركة الأصلية كتبت بواسطة _amr.mostafa_ عيالك دول هدبحهم في العيد ان شاء الله بالنسبه لجده والهبل ده عشان ما تخرجش بره الموضوع يكفي اني اقلك بلد زي السعوديه ما فيهاش بنية تحتية ومجاري تخيل لسه عربيات المجاري بتيجي تفضي وتشيل من البيارات ..!! جده بقالها سنتين بينزل سيول نص ساعه ساعه وتغرق

لاحول ولاقوةالا بالله طاب العالم دى معاها فلوس ميعملوش صرف صحى لية




شكرا خاص ل للاساتذة ( احمد هيونداى وساد بيرد والشافعى و عبده وكارديو اللى فتحت الموضوع وكلنا استفدنا ولكل الناس اللى شاركت فى الموضوع )