تعليقا على كلام فادى
لكن ما انا واثق منه ان مبارك كان وطنيا, و كانت قراراته كلها من منطلق وطنى,
|
اصلا اصلاً لما تعتبر ان وطنك حدودة دولتك بس ده يبقى غباء وطنى ولما تبقى محصلة قراراتك تهميش دورك الدولى والاقليمى وسخط جيرانك العرب عليك ولا يبقى لك من رصيد دولى الا عطف امريكا وصداقة اسرائيل تبقى فين الوطنية بقى
ولا تقصد ان مبارك وطنى !! ده على اساس انة رئيس الحزب الوطنى برضو ؟؟
|
و لا ان نحمله وزر كل فاسد فى هذه البلد, فكل بلاد الدنيا فيها فساد.
|
لاء طبعاً مش هنحملة وزر كل فاسد هنحملة وزر 99,9% منهم بس واولهم الفاسدين من حاشيته اللى اختارهم وعينهم بنفسه
|
و لا حتى ان نحمله وزر ديكتاتورية النظام, و لا قمع النظام, فمبارك لم يستلم مصر من السادات جنة الديموقراطية فحولها الى دولة بوليسية,
|
وايه اللى منعة يحولها لجنه الديموقراطية هى 30 سنة مكانتش كفاية ؟؟
تفتكر ايه الوقت الكافى لتحول بلد زى مصر للديموقراطية ؟
ولا انت شايف ان احنا منستاهلش الديموقراطية والحرية اصلاً وحلال فينا اللى كان بيحصل ؟
بل استلم مصر دولة بوليسية و شمولية,
فحولها الى دولة منفتحة,
|
انا مش عارف منفتحة على ايه بالظبط ولا ازاى ياريت توضح بامثلة ؟
|
تحسن الاقتصاد و البنية التحتية,
|
هو المفروض اى نظام يحقق التحسن اللى بتتكلم عليه ده لكن اللى بيحكم 30 سنة وفى ايدة كل الصلاحيات ديه ممكن يعمل نهضة اقتصادية مش بس تحسن
|
أصبح هناك هامش كبير من الحرية فى عهده, لا ينكره احد,
|
ومين قال ان الهامش ده كفاية ومين قال ان دولة زى مصر تعيش بهامش كبير ولا صغير يا اخى حتى لو اقريت بالهامش ده بس احنا شبعنا من الهوامش بقى عايزين نتنقل لنص الصفحة
|
دولة مستقرة امنيا.
|
خدعوك فقالو ..
اى استقرار وكان عندك اعتصامات واضرابات عمال من سنين بدون حل وفساد للركب حسب تقارير الشفافية وانهيار فى التعليم ونسب بطالة بتزيد واطفال شوارع وجرائم مكناش بنسمع عنها وظواهر مشوفنهاش الا فىى العصر المبارك من تحرش وبلطجة
ولا استقرار الاوضاع فى حوض النيل تقصد وتضائل شعبيه مصر عالمياً وثقلها السياسى فى المنطقة
ولا الفتن الداخلية بين مسلمين واقباط وبدو وشرطة ونوبين والدولة واهلى وزمالك وشوبير ومرتضى منصور
اذا كنت بتسمى ده استقرار يا فادى فانا مع الانفلات بصراحة
|
فأرجوكم لنكن حياديين, و لنذكر للرجل محاسنه.
|
ايوه طبعاً .. انت قول بس واحنا هنقول وراك