العربيه بسم الله مشاء الله والحمد لله أكثر من رائعه ، ثابته بشكل يخض ومش زى ما الكثيرين بيقولوا إن صوت المتور عالى بالعكس ، زيها زي المرسيدس مثلا وإن كان المشكله الوحيده فيها هى التسارع بتعها فقط.
العربيه فى الطلعه الأولى ثقيله شويه ، وإن كان الواحد مع الوقت بياخد على كده ويبدأ يتعامل ويتأقلم مع كده ، بس بعد الغيار الثانى العربيه بتبقى رائعه من حيث التسارع والثبات .
أنا جربتها على الملفات بسرعه 90 كلم ، العربيه وما تحسش بسرعتها (وزنها طن و100ك) .
العربيه خليجى ، بصراحه أحسن وأحلى من الوكيل ألف مره ، الهاى لاين الخليجى أعلى فى الأوبشن من الهاى لاين المصرى (فرش جلد وفى الوسط قماش + سخانات فى الكرسيين الأمامى ، زينون متحرك مع الدركسيون ، جنط 17 يدها ثبات أكبر ، باركينج سينسور أمامى وخلفى ، جي بى إس (بحاول أشغله ، بس مش عارف ، نفسى حد يفدنى) ، كاسيت أكثر من رائع )
بصراحه العربيه رائعه ، بس هى ما تنفعش لشاب غاوى جرى وشد ، هى عائليه أكثر منها شبابيه ، بس ممكن تمشى شبابيه برضه ، بس من فى الشد.
على العموم لو حد عنده إستفسار ، أو عاوز يعرف عنها أى حاجه أنا جاهز ، خصوصا لو حد عاوز يعرف الفرق بينها وبين اللانسر أو السيراتو ، (العربيتين معايا برضه)
وشكرا لكل اللى باركلى وربنا يرزقه أحلى منها
