[حسام البورسعيدى]

المشاركة الأصلية كتبت بواسطة waelsalah السلام عليكم ازيك يا بشمهندس سمير يارب بخير علطول كنت عاوز اعرف الطريقه المثلي فى القياده من حيث استهلاك البنزين والمحافظه ع الموتور( حيث الاستهلاك كويس فى السفر لكن عالى جوه البلد ) انا بغير كل 2.5 او 3 rpm فى ناس بتقولى انقل بدري عن كده بس سمعت ان ده بيأثر ع الموتور واننا لازم نشبع النقله بسرعتها وكمان ما كبسش بنزين بعد النقله علطول ولا حضرتك رايك ايه ؟ وشكرا جزيلا

شوف يا كبير ..

حط فى دماغك ان دوستك لدواسة البنزين هى اللى هتحكم الاستهلاك بتاعك ...

يعنى كل ما تضغط عليها اكتر الاستهلاك يزيد معاك .. بغض النظر عن النقلة اللى انت عليها ..

يعنى ..

ممكن تبقى جايب التالت بدرى وتيجى تدوس بنزين العربية تطلع بالراحة اوى .. فانت تحس انك كده بتوفر بنزين ولكن الحقيقة انك بتزود الاستهلاك لانك خانق العربية بغيار عالى على سرعة منخفضة وبالتالى محتاجة قوة اكبر علشان تقدر تمشى ...

وفى نفس الوقت لو حرقت زياده على الغيار هتزود الاستهلاك ...

فانت حاول تعود رجلك على ضغطة متوسطة للبنزين واتعامل مع الفتيس على اساسها ...

عندك كمان فكره حلوة لتوفير الاستهلاك ..

لو انت ماشى فى طريق طوالى ومفتوح وعاوز تثبت على سرعة نفترض مثلا 50 كم/س .. طبعا الطبيعى انك تكون ماشى على التالت فى السرعة دى وهيكون الـ rpm فى حدود 2.5 تقريبا .. لو هتثبت على السرعة دى شوية تقوم جايب الرابع .. هتلاقى العربية عاوزة تسرع اكتر لو فضلت ضاغط نفس ضغطة البنزين وانت ع التالت ...

تقوم انت مخفف رجلك من على البنزين بحيث تثبت سرعة العربية ..

وهكذا فى جميع السرعات والغيارات ...

هتحس بفرق كبير باذن الله + انك هتريح الموتور اكتر ..

ودى نفس فكره الفتيس الاتوماتيك ....