أولا:ً أهلاً بيك فى بيتك الثانى: مصر موتورز
ثانياً: عربية مسقطة موتور يعنى تم إستبدال موتورها بأخر ذو سعة أكبر أو قدرة حصانية أكبر لرفع كفاءة العربية ( سواء جديدة أو قديمة) أو لتلف الموتور الأصلى للسيارة و يشترط القانون المصرى (على حد علمى) أن يكون الموتور المستبدل من نفس ماركة السيارة و لمعلومات حضرتك إن موتور العربية و الشاسية بتاعها ليهم بصمة (رقم مسلسل) لتمييزه عن أى موتور أو شاسيه أخر بإعتبار أنهم أساس العربية
و يتم إثبات رقم الموتور و الشاسيه فى أوراق العربية و لو حضرتك بتشترى موتور جديد للعربية فلازم تروح المرور علشان تثبت ده فى ملف العربية ... و كلام فى سرك فى ناس بتضرب ورق الإفراج الجمركى بتاع المواتير علشان يتكتب فيها إنها من نفس نوع عربيتك و تقدر تحط بصمة الموتور فى ملف السيارة و تبقى كل حاجة سليمة و ده طبعاً بيكون لو حضرتك عايز تغير موتورك بماركة تانية
طبعاً تغيير الموتور لرفع الكفاءة بيعمل فرق رهيب فى سحب العربية و سرعتها القصوى و ده بيبقى حسب رغبتك لإن الكثير يكره تسقيط موتور للعربية (خصوصاً لو قديمة) علشان ثبات العربية و نظام التحكم فيها (خصوصاً الفرامل) بيكون متصمم على قدرة موتور معين لذلك تسقيط الموتور قد يتطلب تغيير نظام الفرامل و أحياناً العفشة
حضرتك ممكن تعرف إن العربية مسقطة موتور إما من أوراقها أو من الكشف عليها
أحياناً لو موتور العربية مستهلك جداً و لا يحتمل عمرة فيفضل تسقيط موتور حتى لو حالته متوسطة
مصدر المواتير إما بيكون إستيراد (مستعمل و مصدر من دول أجنبية) و ده بيكون سعره كويس و ممكن تشتريه من عربية فى مصر إما صاحبها بيغير موتورها لأخر أعلى فى الكفاءة أو من سيارات الحوادث ( لو الموتور لسه سليم)
أتمنى أكون أفدتك