المشاركة الأصلية كتبت بواسطة salmonkalou
انا نفسي اركب عربية بس المشكلة مش في اني اجيب العربية
المشكلة في تعلم القيادة من فترة كده واحد علمني الوساقة بس كانوا 3 ايام كل يوم تقريبا ساعة بس سبته علشان الحالة النفسية بتاعتي بقت واقعة خالص حاسس ان تعلم السواقة دا حاجة صعبة جدا ومش ح اعرف اتعلمها خالص .....فلو حد منكم مر بنفس الظروف دي يقولي اتعلمها في قد ايه وهل انهار نفسيا وحس انو مش ح يعرف يتعلمها خالص ولا لأ.....وعايز استشيركم واحد صاحبي قالي انا اعلمك السواقة كل يوم من ساعة لاتنين لمدة 10 ايام وحتبقي ميت فل في السواقة فايه رأيكم اوافق ولا ارفض انا خايف اوافق ومعرفش اسوق والحالة النفسية تبقي اسوأ من الاول
لان نفسي اركب عربية واتعلم السواقة ساعتها ح ابقي طاير في السماء.
ارجو الافادة من حضراتكم
|
بص يا سالم يمكن اللى هقوله مش هيكون جديد عن المشاركات اللى قبل منى
بس لازم اعرفك حاجات مهمه جدا فى السواقه
السواقه ....
اولا : قرار بمعنى انك لو فضلت حاطط فى بالك كده انك مرعوب من السواقه وانك لا يمكن تتعلمها فتاكد انك لا يمكن انك تتعلمها ... لازم تكون واخد قرار بانك هتتعلمها وان الموضوع مش هقدر اقول انه تافه ولكن مش بالصعوبه اللى انت بتقول عليها دى وبتوصفها
ثانيا : جرائه بمعنى انك لازم تكون جرىء وانت بتسوق وخد بالك ان فيه فرق كبير بين الجراءه والتهور ولازم تعرف انك هتقابل وانت بتسوق مواقف لازم تاخد فيها قرار جرىء وسريع ودا تجنبا لاخطاء الغير .. ودا يمكن السبب ان 90 % من الرجالة اللى بتسوق بتلعن وتسب فى الستات اللى بتسوق لانهم بطبيعتهم ماعندهم الجرائه دى
ثالثا : خطوات بمعنى ان الموضوع مالوش دعوه بعشر ايام ولا 3 ولا حتى سنه
انت لازم قبل ما تتحرك بالعربية تاخدها خطوات ..
لازم فى الاول تعرف العربية ومعرفة ولو سطحيه عن اللى جوه كبوت العربية وازاى تقرا التابلوه وفايده كل عداد ايه ولما المؤشر فى كل عداد يتحرك يبقى الدنيا تمام ولا فيه مشكله وازاى تحلها ... وبعد كده تتتعرف على الدواسات والغيارات وفرامل اليد وطبيعه عملهم .. وبعد كده واحده واحده تبتدى تتحرك بالعربية والخطوه دى بالذات جواها خطوات كتير بس تأكد ان كل خطوه هتبقى افضل من الخطوه اللى قبلها اذا استخدمت نقطه 5 صح ( التعلم من الاخطاء ) لان كلنا بنغلط والغلط مش عيب بس العيب اننا مانتعلمش من اخطائنا
رابعا : ممارسة ... انا شخصيا لما بقعد كتير مابسوقش وانا بقالى 15 سنه بسوق بحس انى غريب على العربية او العربية هى اللى غريبه عليا .. يعنى فيه حاجه غلط بس طبعا بما انى بسوق من زمان فبرجع اخد على الموضوع بسرعه.. فلازم تكون ممارس بصوره مستمره لان الممارسه بتكثبك شجاعه وثقه بالنفس ومعلومات ومواقف جديده
خامسا : التعلم من الاخطاء .. بمعنى ان الخطا اللى انت وقعت فيه المرادى ماينفعش انك تقع فيه تانى .. لازم تتعلم كويس من غلطك وماتكرروش تانى
وزى ما قلتلك مش عيب اننا نغلط لان كلنا بنغلط ومافيش حد كامل بس اهم حاجه اننا مانكررش غلطنا
سادسا : اداب .. بمعنى انك تراعى قواعد السواقه كويس من اشارات وركن العربية والالتزام بالحاره المروريه والالتزام بالسرعه المناسبة للطريق وتحديد الحاره المناسبة فى الطريق طبقا لسرعتك ودا كله تجنبا لاخطائك واخطاء الاخرين
اسف انى طولت عليك بس اعتقد ان هو دا الصح وربنا يوفقك ومستنيين انك تقولنا قريب جدا انك بدأت خطوتك الاولى .. وانك مش خايف
ربنا يوفقك