[حازم شاهين]

أنا أرفض الفكرة دى جملة و تفصيلا

إزاى بعد كل التضحيات دى و الكفاح ده علشان الحرية عايزنا نرجع تانى لدولة الخوف و البطش
و القول بإن الشعب المصرى أغلبه غوغائى و لازم يتحكم بالحديد و النار كلام مغلوط تماما
متخلوش تصرفات قله قليلة و تركيز اﻹعلام عليها يضللنا
أغلبية الشعب المصرى بيروح شغله كل يوم حاليا و بيحاول يرجع يعيش حياته العادية
لكن اﻹضرابات و اﻹطرابات دى لا تمثل اﻷغلبية أبدا و زى ما قولت إللى مضخمها هو تركيز اﻹعلام عليها

كمان مش معقول بعد قهر سنين طويلة مش قادرين نستحمل إنفلات فى المطالب و طرق التعبير عنها كام يوم، و بعد فترة هتتحول طرق التعبير دى من طرق غيرطبيعية إلى طرق حضارية و سليمة لما يبقى عندنا نقابات حقيقية و لما يبقى عندنا أحزاب بتعكس التيارات المختلفة و لما يبقى عندنا محليات منتخبه من الشعب بطريقة سيمة
لكن إحنا حاليا فى حالة ممارسة الحرية بطريقة فجة نتيجة لغياب القنوات الشرعية للتعبير عن الرأى طول عقود ماضية و لغاية دلوقتى

و لازم نفرق بين حاجتين مختلفتين

البلطجة و ترويع الناس و دى الجيش بيحاول التصدى ليها بكل قوة و بدون التعدى على مبادىء حقوق اﻹنسان بقدر اﻹمكان
و المطالب المشروعة لفئات عاشت سنين فى ظلم و قهر و حرمان

أتصور إنه بعد فترة قصيرة الوقفات و المظاهرات هتبتدى تقل تدريجيا و خصوصا لما الناس تبتدى تحس بالتغيير الحقيقى و الحكومة تبتدى تاخد قرارات لمصلحة الناس
الموضوع محتاج صبر شوية و الجاى أحسن إن شاء الله
لكن أبدا لن نعود للدكتاتورية بأى شكل من اﻷشكال إن شاء الله
ا