اعتقد ان الاخ الفاضل عاوز يشد العربية بالكامل فعاوز يعرف ايه ترتيب الشغل عند الصنايعيه
بالنسبة للجنوط الاصلي بتاعها فى العاده بيكون مقاس 13 هوا الجنط المروحه ( بيسموه كده )
الفرش لو تعرف تشوف الفرش بتاعها الاصلي او حاجه تكون اقرب له ( سواء استيراد او تفصيل )
الترتيب ( بعض الافكار ) فى حاله التجديد الشامل
الراجل اللي بيركب وبيفك طقم الصوت ( لو فيه فى العربية طقم صوت يتفك الاول علشان الصنايعيه مش يعيشوا عليه و تلاقيه فى الاخر مش مساوي )
الكهربائي ( فك الفوانيس والعدادت وكهرباء التابلوه كافه متعلقات الكهرباء )
السروجي ( فك الفرش من صالون وباب و باكتات و كوبسته و اي كنسوله تابلوة لو موجوده و اعمل حسابك فى مكان أمين تشيل فيه حاجتك لان مفيش حد هيحافظ علي حاجتك غيرك بس لو مفيش مفر ممكن تبقي تسيب الكراسي و الكنبه والسجاده عند السروجي وتاخد الحاجات اللى ممكن تضيع من عنده بشرط انه مش يعلق اي حاجه منهم على الحائط ويسيبهم على الارض لان الكوبسته بتاعتي اتقطعت من كده ومش عارف الاقي زيها )
تغطي طارة الدركسيون بطارة قديمه او بحاجه او تلف عليها قماش وتربطه كويس علشان ايد الصنايعيه مش تلحوسها و ممكن فى الدوكو ان معجون يدخل فى المسامات المفتوحه فى الطاره ويكون صعب التنظيف )
و متخليش فى العربية اى ادوات غير الفرده الاستبن لو انت هترش ولو مش هترش شيلها منها وحطها فى الجراج
وبعد كده تعمل زي ما الاخ الفاضل مستر استرا قال
لو عمره او طقم شنبر
الميكانيكي يفك الماتور
السمكري ( يشوف شغله فى العربية ) ولازم تنقي سمكري كويس لان شغله هوا الاساس
والبوهيجي ( يشوف شغله لحد قبل ما يفنشها ) مش تنقي سمكري وبوهيجي عارفين بعض ولا سمكري يوديك لبوهيجي عارفه علشان بيداروا علي عيوب شغل بعض
و ترجع تاني للمكانيكي يسقط الموتور وتشوف العفشة والفرامل و تضبط الابواب والكهربائي
وترجع تاني للبوهيجي يفنش شغله وربنا يبارك لك فيها ويكفيك شرها