[خالدخليفة]

حمى المظاهرات

العيال زمايل سلمى بنتى فى المدرسة قرروا القيام بمظاهرة وطبعا اخدوا سلمى معاهم وخصوصا انها طويلة وتملا العين وهات ياهتافات فى المدرسة
وطبعا لانهم شوية عيال فهتافاتهم كانت طريفة ومطالبهم كانت أطرف
فكانوا يطالبون بألغاء ملف الأنجاز (أعمال السنة سابقا ) ورحيل مديرة المدرسة (دى نكتة والله )
ومن الذ الهتافات
عارفين بنسقط ليه ....... الدرس ب100 جنيه
الطلبة يريدون رحيل المديرة
ارحلى ياعيشة .....ارحلى ياعيشة (عائشة هو أسم مديرة المدرسة )
وأحد السادة المدرسين راح هايص فى الهيصة واستخبى ورا احد الأبواب وبقى يزعق فى الطلبة
ويقول / بس ياولاد وطو صوتكم مش كده ...... ثم يشير بكلتا يديه من وراء الباب لكى يرفعوا صوتهم اكثر بالهتافات
وطبعا كانت مظاهرة كوميدية واضطرت المديرة الى أحضار عصا غليظة (نفس تصرفات مبارك )والجرى ورائهم فى الحوش وكان المنظر كوميديا طبعا
ثم اتصلت أحدى زميلات سلمى بأمها فى البيت لكى تخلع من المظاهرة بشياكة .......... لكن حدثت المفاجأة التى لم تكن تـتـوقعها فهى قد طلبت أمها على الموبايل فى وسط الهيصة والهتافات لكى تسمع أمها فتخاف عليها وتشخط فيها وتأمرها بالعودة للبيت فتعتذر لزميلاتها وتخرج من المظاهرة
ولكن المفاجأة أن الام حين ردت على التليفون سألت بنتها / ايه الهيصة دى؟؟؟؟؟
فردت البنت / دى مظاهرة فى المدرسة ياماما وانا فى وسط المظاهرة دلوقت والمديرة جابت عصاية وناوية تضربنا
وكان الرد المفاجىء / ربنا يقويكى يابنتى .....أثبتى ..... وانا جاية لك
وصعقت البنت وقالت / أيه الأمهات دى بدل م تشخط فيا؟؟؟؟؟؟؟ تقولى اثبتى ؟؟؟؟ وكمان هتيجى تشارك معايا ؟؟؟؟؟؟؟
ههههههههههههههههههههه
وملف الأنجاز هذا الذى يطالب الطلبة بألغاؤه هو بالبلدى كده دفتر المكتب بتاع أعمال السنة بتاع زمان بس معمول بطريقة هيروغليفى لايفهمها اللا المدرس فـقـط....... ولايستطيع الطالب أو ولى أمره ان يفهمها ومن خلال هذا الملف يستطيع المدرس استعادة جزء من كرامته وهيبته المفقودة والتى سرقها منه عصابة مبارك منذ أن كان أحمد فتحى سرور على رأس وزارة التعليم ونظرا لانجازاته الرهيبة فى تخريب التعليم فـقـد تم تصعيده الى رأس مجلس الشعب لكى يسيطر ويفصل ويهندس كل شىء على مقاس صاحبنا وعائلته
والا ماتفسير انه يتم تصعيد شخص لرأس السلطة التشريعية وهو من خرب التعليم فى مصر بدلا من تطويره
انها سياسة فرق تسد
فكل ماعليك ان تلهى الشعب فى أى مشاكل فرعية وجانبية لكى لايلتفت اليك
وقد كان
فاحمد زكى بدر اخترع قصة ملف الأنجاز لكى يستخدمه المدرسون ( الغير محترمين طبعا ) سلاحا فى وجه الناس من أجل الدروس بدلا من رفع مرتباتهم والتى بدأو يطالبون برفعها
أى سياسة/ أضرب الشعب بالشعب
ويبدو ان الشعب اصيب بحمى المظاهرات ....... أى حاجة وخلاص ..... المهم انك تعمل شجاع وتطلع تهتف وبس
ثم تجلس وسط أسرتك ليلا او على القهوة بين أصدقائك وانت منهك ومنكوش وحالتك تصعب على نتينياهو (اللى مبيصعبش عليه حد مننا ) وتحكى كيف أنك تصديت للمدير وأمن المصنع وانهم حين تصدوا لك جريت واستخبيت ورا فردة كاوتش مرمية على الأرض وعملت منها ساتر وحدفتهم بالطوب ......وأنك لن تسكت حتى يمشى المدير الحرامى
ياااااااااااااااااااااااا ااااااااااااااااااااه

مبارك كان كاتم على نفس كل دول؟؟؟؟؟ .........أنا اعتقد ان الناس بـتـتـنفس ليس الا ......ووسط التنفس ده بيطالبوا بأى مطالب ليهم ........حتى ابراهيم حسن الذى طالب بحرق الثوار فى ميدان التحرير الأن يطالب مرتضى منصور بمطاردة الفاسدين فى النادى الأهلى (مش الزمالك) وتعرية حسن حمدى والخطيب الحرامية اللصوص
ولكن هذا المتسلق لايتنفس بل يركب الموجة الثورية ....... لكى يستعيد جزء من شعبيته التى هبطت الى الحضيض بعد مطالبته بحرق الثوار ورشهم بالمياه ..... والمسكين ياعينى بقى له 48 ساعة بحالهم محدش كلمه كلمتين من أى قناة تليفزيونية او اى جريدة او اى حاجة

وفى الحقيقة الحكومة لو زودت مرتبات كل هؤلاء فهى كده بتعمل كل اللى عملوه الرؤساء السابقين
من طبع فلوس وزيادة المرتبات لأرضاء الناس ما يؤدى الى ارتفاع نسبة التضخم فى الميزانية وبالتالى غلاء الأسعار مما يجعل الزيادة لاقيمة لها
لان الحكومة هتجيب منين ؟؟؟؟؟ مهو بقرش يابصل ويابصل بقرش ( على رأى خالتى بمبة / وربنا يجعل كلامى خفيف عليها )
فـفى الوقت الحالى الايرادات 10 قروش مثلا والمطلوب 15 وبعد الثورة والمطالب الجديدة اصبحت الأيرادت 5 قروش وأصبح المطلوب 20
سياسيا وليس اقتصاديا يجب أرضاء كل هؤلاء لان التغيير والتخلص من الفاسدين ثم بداية دوران عجلة الأنتاج مش هياخد اقل من 7 الى 8 شهور يعنى ننسى ميزانية 2011
وأرضاء كل هؤلاء يتطلب اعطاؤهم ال 20 قرش التى يطالبون بها ....أذن ندخل فى مفاوضات وهمية تنتهى بأجابة كل مطالبهم
وينصرف الجميع وهم يشعرون بالأنتصار
ثم تقبض مرتبك بعد الزيادة وتذهب لتشترى السكر لتجده اصبح ب 10 جنيه مثلا وتشترى الأرز العادى مش البسمتى لتجده اصبح ب7 جنيه وهكذا
والتصرف الأقتصادى لن يأتى اللا بمزيد من الأوجاع فهو معناه رفض جميع طلبات كل هؤلاء المادية فى الوقت الحالى
وبالتالى استمرار المزيد من المظاهرات
لعنة الله على ميكيافيللى .............فهو صاحب كل هذه النظريات الفاسدة ...... فلا الشعب يريد ان يفهم ويستوعب ولا الحكومة تريد ان تشرح وتحاور وتقنع
بل
مفاوضات وهمية........... لكى لاينكشف الملعوب ثم تنتهى بأرضاء الجميع .....ثم غلاء جديد حتى يأتى من يقوم باصلاح أحوال الأقتصاد والبلاد والعباد ......ان كان هناك من يريد الأصلاح

وانا شخصيا بدأت اعجب من اخواننا الثوار فحكومة تصريف الأعمال عمالة بتراضى فيهم .....صحيح بالقطارة
لكن هناك دائما حد لأى شىء...... وطبيعى جدا أن يقع الجيش فى أزمة بين الثوار والوزراء
فأى وزير من أصحاب الخبرات العالية والكفاءات المحترمة يعلم انه لو قبل الوزارة الأن يبقى بـيـحرق نفسه وأسمه ولذلك لن يقبل الوزارة بل سينتظر الرئيس القادم ليعرضها عليه .....وأبرز هؤلاء عمرو موسى حين عرض عليه مبارك حقيبة الخارجية مرة أخرى ورفض والأن يقوم بالدعاية لنفسه كرئيس جمهورية
وبالتالى لن يقبل الوزارة الا وزير طمعان او عشمان فى لقب وزير وهو يعلم انه سيممشى بعد عدة شهور ويبقى استفاد بمعاش وزير بدل معاش وكيل وزارة
وفى هذه الحالة سيأتى من لاخبرة لهم ولاوزن مثل وزير الزراعة الحالى

أو سيأتى رجل فدائى يحاول خدمة هذا البلد لكنه يكتشف انه يلعب فى الوقت الضائع
ولذلك مبارك لم يجد فدائـيـيـن حين قرر تغيير الحكومة
اللهم الا أحمد شفيق رئيس الوزراء حتى ان احدهم قال عنه الرجل الصح فى الوقت الغلط
ولذلك جائت وزارته بها 15 وجه قديم لانه لم يجد من يقبل الوزارة
وحتى الثوار يطالبون برحيله .........طب ليه ياجماعة .....فيردون بأنه من رجالة مبارك ولازم يمشى
طيب مهو مبارك جابه أصلا علشان يراضى الشعب الغضبان وقتها وكان مطلوب منه تشكيل حكومة فى خلال 24 ساعة
وده طبعا أحد أنواع سلق البـيـض
فهو حرق نفسه حين قبل رئاسة الوزارة فى هذه الظروف العصبية

ولذلك وبعد تفكير هادىء اعتقد ان هذا الرجل فعلا يريد خدمة مصر

وأنا مع الثوار فى اخراج المعتقلين السياسيين من السجون بلا ذنب اقترفوه

وأنا معهم فى ألغاء قانون الطوارىء (الذى لم يلغ حتى الأن )
ولكن لست معهم فى تغيير الوزراء والمطالب المادية الكثـيرة
فالاصرار على هذه المطالب سيأتى بالسفهاء والحالمين بالوزارة ومعاشها والحالمين بلقب وزير سابق والذين يعلمون انهم مع اول انتخابات سيركبون اول تاكسى ذاهب الى البيت وبالتالى لن يعملوا كثيرا
والاصرار على المطالب المادية سيؤدى الى الغلاء كما قلنا سابقا
أذن فليس أمامنا الأن الا الصبر وانتظار ماستأتى به الأيام
وأن غدا لناظره قريب ..... وماميدان التحرير منا بـبـعـيـد