[mesho70]

احاول اجاوب على حضرتك عن تجربتى الشخصية مع الفيرنا
بداية بما انها اول مشاركة لك يبقى اهلا ً بك معنا فى بيتك ووسط جمهورك
وشوف يا هندسة
1 - موضوع المطبات :-
- من عيوب الفيرنا انها واطية وقريبة من الارض وبتحك فالمطبات خصوصا ً لو معاك اوزان بالعربية
- و لو حضرتك بصيت تحت العربية هتلاقى ما يشبة البوكسين بطول العربية وهم اللى بيحكوا
- وطالما بتاخد المطب بهدوء مش هيتأثروا جامد
- ولكن مع التكرار بيشيل طبقة العازل السوداء مما يعرض العربية للصدأ والبارومة لو انت فى مكان ساحالى رطب
- الجزء الثانى هو الشكمان وبرضو لو المطب بهدوء التأثير بيكون خفيف وتأكد من سلامة جلد تعليق الشكمان ولو الحكة فالشكمان غير الجلد ودة رخيص جدا ً
- والحل حاول تاخد المطب بهدوء وبعرض المطب قدر المستطاع
2 - موضوع الصوت المكتوم :-
- لازم حضرتك تتبع تعليمات كتيب الصيانة يعنى فلتر الزيت كل 5 الاف كم وفلتر البنزين كل 10 الاف كم وفلتر الهواء كل 15 الف كم مع الالتزام بالصيانة الدورية بمواعيدها فهو هام جدا ً للعربية
3 - موضوع البنزين :-
- العربية حقن الكترونى يبقى انسب بنزين لها 90 او 92 لان الفارق بينهما - حتى الآن 10 قروش يبقى خليك فى 92 افضل ولو حصل مرة انك حطيت بنزين 80 مخلوط ب 90 مش هتحس بمشكلة فورية الا ان كانت حساسيتك عالية خصوصا ً مع سحب العربية ولكن البنزين 80 مع طول استخدامة بيقصر عمر الموتور وطبعا ً خلط البنزين ليس بة مشكلة ( فى اعتقادى الشخصى ) ولكن بلاش 80 افضل للسيارة يعنى ممكن تمون 90 وتكمل 92 عادى
4 - موضوع الغربلة فى الدريكسيون او الحدفة يمين او يسار خصوصا ً مع السرعات العالية :-
- لازم الاول يكون الجنوط سليمة و الكاوتش سليم ونوع محترم - خاصة وان الكاوتش اللى بتنزل بية العربية 2008 نسر مصرى وهو سىء - وسلامة الجنط والكاوتش يبحددة جهاز الرصرصة
- وترصرص الكاوتش وتظبط زوايا ( عند واحد سمعتة كويسة ) وبعدها ممكن تلاقى الغربلة اختفت تماما ً حتى سرعة 130 او 140 ولكن بعد كدة مهما حاولت هتلاقى غربلة او رعشة الدريكسيون وان كانت بتقل جدا ً
اتمنى ان اكون افدتك