دروس خصوصية
اعترف اننى بعد سنوات طويلة من التجارة اننى تاجر خايب وموكوس على رأى خالتى بمبة وربما لولا طولة لسانى السياسية احيانا وطيبة قلبى احيانا اخرى لكان معى قرشين مش بطالين
لكن فى فرق بين قرشين مش بطالين وشوية قروش تسد مجرى البحر الابيض المتوسط
والبحر الأحمر الغير متوسط خاااااالص
طيب أيه الموضوع
الجدع اللى اسمه زهير جرانة وزير السياحة السابق
اثبت انه مخه عبقرى بل هو يمتلك سوبر مخ .............أفكاره ذرية واحيانا نووية
فهو حين تولى مسئولية وزارة السياحة فى عام 2005 كان مدينا ب 300 مليون جنيه
وحين خرج من الوزارة فى يناير 2011 كان يملك 13 مليار جنيه
يعنى فى 5 سنوات فـقط سدد 300 مليون جنيه ديون ثم حوش 13 مليار جنيه غير انه اشترى قصر جااااااااااامد جدا على أول طريق مصر اسكندرية الصحراوى من ناحية ميدان الرماية
وأنا شخصيا مستعد أخد درس خصوصى عنده فى التجارة يمكن ابقى مليونير مش ملياردير
وهسدد فلوس الدرس بالتقسيط أو بعد أول عملية
المهم انى اتعلم الشطارة ونفسى أبقى شاطر
وساعتها وممكن أقل بأصلى ومعرفش ناس كتير وأولهم احمد كورسير ( واحد كده.....بيشتغل i t ) لانه فـــتان وممكن يتعلم الشطارة اللى انا اتعلمتها من جرانة وبدل م نبقى مليونيرات سوا ييجى يفضحنى هنا
ومن بين الناس اللى ناوى اخد عندها دروس الواد حبيب العادلى بتاع الداخلية الشاطر
اللى من مرتبه كوزير اصبح يملك 8 مليار جنيه فـقـط ........... قنوع برضه الجدع ده
لكن اللى انا مش فاهمه ازاى تجارة حديد التسليح او تصنيعه تعمل ثورة 60 مليار جنيه
صحيح احترس من كل من أقترب من الأرض وكل قصير مكير
احمد عز قصير بس جبااااااااار ولما سألوه عن معلومة ان ثروته تعدى ال 60 مليار جنيه لم ينكرها ولكنه قال ان كلها اسهم وسندات يعنى بالبلدى كده ممكن النهاردة ب 150 جنيه السهم بكرة يبقى ب 10 جنيه
ده كلامه بالحرف
يعنى معترف بيها
طيب انا هفتح مصنع حديد جنب البيت عندنا واعمل كشك ابيع فيه حديد وانامش عايز غير ثروة بس.... مليون جنيه
فعلا لقد أثبت هؤلاء الناس ان 95% من تجار مصر خايـبـيـن
وأن الشطارة كنز لايفنى
بس اعتـقـد ان شاء الله انه سيفنى