الـقـدوة
الجدع اللى أسمه اوباما لا بيهش ولابينش وعامل زى خيال المأتة يقولو له (اسرائيل واليهود )يمين يبقى يمين .....شمال يبقى شمال (على رأى عبد الفتاح القصرى )
لكنه قال جملة امبارح عجيبة ومش عارف اليهود فوتوها له ازاى ؟؟؟؟ وزمانه متعلق فى الفلكة دلوقت (جهاز تعذيب كان منتشر فى المدارس زمان او فى البيوت / عبارة عن خشبة ارتفاعها عن الأرض متر وعرضها مترين وبها فتحتين يدخل فيها أرجل الطالب بعد خلع حذائه ويتم ضربه بالعصا عليهم )
المهم
زمان اوباما اليهود بيمدوه على رجليه ليه ؟؟؟؟؟
لانه قال جملة فى ساعة صفا او ساعة غيبوبة او ساعة لقلبك الله أعلم
قال سيادته
يجب ان نربى ابنائنا ليصبحوا كشباب مصر
يعنى بسلامته شايف شباب مصر يستحقو يبقو قدوة لابناء أمريكا
واحنا هنا عندنا اللى بيقول أن العيال دول عايزين الحرق ....وانهم...... وانهم
والكارثة ان هناك من قام بمظاهرات لتأييد مبارك من يومين (يوم الجمعة ) وسموها جمعة رد الجميل
جميل أيه وبتاع أيه ؟؟؟
هو فين الجميل ؟؟
محدش قال
وكاتبين يفط
شكرا ياريس ....هتوحشنا ياريس
وناس منهم نازلين بكاء بحرقة
وقلت يمكن يكونو يقصدو الريس متقال ( مطرب صعيدى صوته كان عاااااالى جدا ومن أشهر اغانيه (ياحلوة ياشايلة البلاص )]
ولكن لما شفت الصور متقال بشنب وعمة وجلابية
أيه ده معقول الناس دى بتعيط على مبارك
هما مسمعوش عن برنامج اسمه واحد من الناس ؟؟؟؟؟
كانت بتيجى فيه حالات تقطع القلب وناس ساكنة فى عشش (جمع عشة)
مسمعوش عن مساكن الدويقة المنهارة على دماغ الناس؟؟؟
مسمعوش عن قطارات السكة الحديد اللى كل يوم مقلوبة؟؟؟؟ لدرجة انى انا شخصيا كنت سايب وصيتى فى البيت لانى بركب القطار يوميا
مسمعوش عن عبارة مات فيها 1200 نفس بريئة
هو نفسه (مبارك ) مسمعش عن الحاجات اللى فاتت دى ؟؟؟
لو كان مسمعش تبقى مصيبة ( لانه ولامؤاخذه عايش فى كوكب تانى مش هنقول انه ولامؤاخذة .....................) يبقى ميستحقش يبقى ريس
وان كان سمع فالمصيبة أعظم لانه معنى كده انه متواطىء مع المسئولين اللى عملو فى الناس كده او تسببو فى ان الناس يحصل لها كده
ويستاهل الاعدام رميا بالصرم القديمة (جمع صرمة قديمة / الجزمة ولامؤاخذة)
والله الشعب المصرى طيب وغلبان واحيانا عبـيـط
وانا بفكر اخرج اتـشـحـتـف شوية فى اعلان فى التليفزيون يمكن أبقى رئيس جمهورية او ألم لى قرشين
ياناس فكروا شوية
أوباما رئيس أمريكا عايز ابناء أمريكا يتربو تربية زى تربية شباب مصر
اصبح شباب مصر قدوة
طيب هما عملو ايه القدوة دول
طردو مبارك
وبيحاولو ينضفو البلد من الفساد
ومن كل المنتفعين والطابور الخامس وشلة حلق حوش اللى مالية البلد
والله انا شخصيا كنت غير مقتنع ان هؤلاء الشباب لايمكن يعملو كده
وبصراحة كده انا بقترح من هنا
اللى زعلان على مبارك يتفضل يحصله
اما فى شرم الشيخ او اسرائيل
واما شباب مصر
فتعظيم سلام كبير اوى اوى اوى لشباب مصر