السلام عليكم ورحمة الله وبركاته
بخصوص الصور
بصراحة الصور والفيديوهات اللي علي النت تغني عن اي صور
وخصوصا اننا كن بنحاول نشارك في صنع الحدث مش تصويره مع اعترافي بضرورة واهمية وفضل تصوير هذه الاحداث لكن كان في ناس تانية قايمة بالدور العظيم ده
الصور اللي معايا كلها صور شخصية اتصورتها في نشوة الاحساس بالنصر
واسمحولي اني معرضهاش تكريما لذكري الشهداء اللي حسيت بعد كده وانا بتفرج علي الصور بتاعتي اني خنتهم لما اتصورت الصور دي واهلهم كانوا بيتحرقوا بدمهم
علي العموم احب ادخل في موضوع الاربعاء الدامي العظيم
اللي من وجهة نظري اصعب واطول يوم في تاريخ الثورة
اليوم بدأ معانا بدري قوي
بدأ من بعد خطاب مبارك هذا الخطاب اللئيم الذي كان يلعب علي عواطف هذا الشعب الطيب
حيث بدأت إتصالات غير طبيعية تنهال علينا جميعا منذ مساء الثلاثاء المليوني العظيم حيث كان اول يوم مليوني يشهده الميدان والذي ارغم مبارك علي هذا الخطاب
كانت الاتصالات تنهال علي كافة المعتصمين وانا منهم
تنهال علينا من اهلنا واصحابنا داخل وخارج مصر الجميع يطالبنا بضرورة التوقف عن الاعتصام والعودة لبيوتنا بدعوي الراجل خلاص كلها كام شهر وهيغور مش عايزين فوضي وخصوصا انه مفيش امن يبقي ارجعوا بقي وادوا فرصه علشان الدنيا تمشي
اللي خلانا نصبر 30 سنه مش هنصبر 6 شهور وعلشان الدنيا تمشي
وكان رد معظمنا ان مبارك كداب وان انصاف الثورات مقابر الثوار
وخصوصا اننا كنا في الاعلام المصري لازلنا خونه وعملاء وبلطجيه وغيره من الاتهامات علشان كده اصرينا علي ضرورة البقاء
مناوشات مبكرة جدا من بلطجية وامن النظام
الساعة الواحدة فجر يوم الاربعاء اشكال اسمحولي اوصفها بالقذرة لا يفوقها قذارة الا اللي بعتها علي ميدان التحرير بدأت التحرش بالشباب عند المتحف ناحية ميدان عبدالمنعم رياض اللي هو كان نقطة المواجهات طول اليوم
الاشكال القذرة دي بدأت من الساعة واحده فجرا تقريبا بهتافات مش مؤيدة لمبارك علي الرغم انهم كانوا بيحملوا صوره
لكن كان سباب قذر لينا ولبعض الرموز والجماعات سباب قذرجدا
الشباب بصراحه اتعامل معاهم بتحضر كامل وقفوا صف علشان ميخلهمش يدخلوا الميدان وبدأنا نطلب من بعض ان محدش يرد عليهم ولا علي استفزازهم لينا وخصوصا ان اعدادهم وقتها كان لا يتعدي 200 واحد
فضل الوضع كده لغاية الصبح
وانا كان نفسي استحمي ومكنتش قلقان علي الوضع لقلة عدد البلطجية
لكن للاسف كتير مننا بعد اليوم المليوني حصلهم حالة استرخاء وروحوا للراحة او الاطمئنان علي الاهل
روحت استحميت ورجعت بعد الظهر وانا في المترو كانت الاتصالات تنهال عليا واكيد علي غيري انت فين الحق البلطجية دخلوا الميدان
روحت لقيت الوضع فوضي ورعب عارم بين الجميع وخصوصا لقلة اعداد الشباب الموجود بالميدان الكل بيتحدث عن البلطجية والسنج والمطاوي والخيم بتاعتنا متكسره حاولت استوعب الموضوع لكن ملحقتش
لقيت البلطجية كتير جدا والشباب بيحاول يصدهم
وفجأة جاءت اللحظة الفارقة دخول البلطجية بالاحصنة والجمل وبكرابيج دخلوا الميدان من عند المتحف
لكن بفضل الله لم يخرجوا منه اخذناهم اسري وغنائم بما اننا كنا في حالة حرب فعليه
هذه اللحظة كانت فارقة في تاريخ الثورة لانها احدثت امرين
الاول احساس الشباب بحالة من الغليان وخرجوهم من حالة التحضر المدني
الي حالة الاحتقان والغضب الكامل من هذا النظام القذر
الثاني كانت وصمة عار ويوم غير مشرف في تاريخ الجيش المصري
يوم يجب محوه من تاريخ الجيش المصري العظيم
وهقولكم ايه الافعال اللي بتدلل علي الامرين دول
هكمل ان شاء الله معاكم احداث هذا اليوم الطويل جدا