أشـاعـا ت
خالتى بمبة الرغاية كانت قاعدة تعمل محشى وفجأة التفت ناحيتى
وقالت / اسمع ياموكوس
يانعم
الجدع مبارك ده عيان أوى وشكله بـيـفـيـص
يـبقى عمره كده.... انا لله وانا اليه راجعون
ولانها من رموز العهد البائد فبعد الجملة الأخيرة
قالت / بس يامنيل ....انا قلت عيان أوى ... مش مات؟؟؟
ماشى .....موافـق
موافـق ؟؟؟؟ انت بتهاودنى؟؟؟
مهو انتى بتقولى كلام عجيب عيان والا سليم ......خلاص هو أصبح تاريخ .....وتاريخ منيل كمان
منيل ؟؟؟طب خد.....وقذفتنى بصباع محشى على وجهى
قلت وانا امسح اثار الرز والخلطة : ليه بس ياحاجة زعلانة منى ليه ؟؟؟
كده..... انت عايز شوية العيال بتوع الثورة يشمتو فيه ويقولو انه هو عيان بسبب تخليه عن الحكم
تقصدى تنحى
لأ ....تخلى
مش مهم المهم انه مشى من وشنا
مشى من وشكو؟؟ والله انتو شعب مايستاهل الخير ابدا
وخوفا من ضربى بباقى حلة المحشى ....لم اناقشها
لكن لسانى بياكلنى
فقلت لها / طيب وهما هيخبو مرض مبارك ليه؟؟؟؟ هما خايفين الخبر يأثر على البورصة ؟؟؟؟ ههههههههههه
وجائنى صباع المحشى الثانى طائرا فى الجو واستقر فى قـفايا
وأكملت حديثها
بص ياموكوس
بصيت
امبارح كانو بيحقـقو مع اولاده
باندهاش /لا ياشيخة ؟؟؟؟....!!!! أيش عرفك بقى
ثم اكملت حديثها
وقالت / انا كنت هناك فى المحكمة
وهى عادة مصرية صميمة .....فأن قال لك أى أحد عن خبر لاتصدقه فيقنعك ان المسئول الفلانى قاله له او انه كان هناك ....ولاتملك الا التصديق
طيب ياخالتى ....وبعدين
علاء اسم الله عليه زينة الشباب دخل على وكيل النيابة ولما سأله عن اسمه
قال / المواطن المصرى علاء محمد حسنى مبارك ........راح وكيل النيابة قام يبوسه وأخده بالحضن
لاياشيخة...... وبعدين ؟؟؟؟؟
ولما دخل جمال وسأله عن أسمه رد عليه وقال / يعنى انت مش عارفنى؟؟؟
شخط فيه وكيل النيابة وقال / انا اعرف انك متهم وحرامى وتقول اسمك كويس والا هحبسك
وبعدين ياخالتى
اغمى على جمال
باندهاش / لا والله.....وانت حضرتى معاه التحقـيق وشفتيه؟؟؟؟
انا شفته وهما شايلينه وطالعين بيه بره
كمان؟؟؟؟
ايوه ياموكوس .....انت شكلك مش مصدق
ولمحت بيدها كام صباع محشى وخفت على هدومى
فقلت / مصدقك ..... بس جمال طويل اوى
ضحكت وقالت / مهو كان 5 رجالة شايلينه
وبعدين
احمد عز .....
قاطعتها وقلت / احمد عز كمان
بثقة / طبعا بس هو أغمى عليه اول م نادو على اسمه
كمان
أيوه ....
وبشجاعة نادرة قلت
بس دى أشاعات وكلام فارغ ملوش لازمة
ولم أدرى الا وحلة المحشى كلها على أم رأسى وسمعتها تقول / والله م انت متغدى.....واجرى روح بيتكو
وخرجت وانا اضحك وجسمى كله ملىء بالرز وخلطة المحشى وهدومى بايظة
لكن تعجبت
الناس تسمع أى حاجة وترددها وخلاص
ثم ان الحكومة بتـنـفى مرض الريس ليه ؟؟؟ مهو هيموت هيموت ....مفيش جديد
وايه الدعاية اللى شغالة لعلاء مباارك دى
احنا مش عايزين العيلة دى خلااااااص
والأيام القادمة ستحمل كثيرا من الشائعات ولايجب ان ننساق ورائها ونرددها كالببغاوات
والا سيكون مصيرنا حلة محشى محترمة لم يتم تسويتها على امهات رؤوسنا
هههههههههههههههه