يا ترى نفسك في ايه ؟؟
نفسي نبقى دوله مؤسسات مش افراد
نفسي في برلمان منتخب من صفوه المفكرين و العلماء و الكفاءات في مختلف المجالات ... ناس نختارهم لشعبيتهم و علمهم و حسهم الوطني مش لمركزهم او نفوذهم او فلوسهم
نفسي في استغلال كل الخبرات في كل المجالات ...
نفسي نستفيد بالجنزوري في التخطيط و عمرو موسى في السياسه الخارجيه و زويل في البحث العلمي و التعليم و البرادعي و العوا والمسلماني و الشريعي و غنيم و الباز و يعقوب و .... و
نفسي يكون الرئيس وظيفه مش رمز ... منصب مش فرعون ....
نفسي كل اللي يجي في مكان يبني طوبه واللي بعده يكمل وراه .. مش يهد و يبني مجد شخصي
نفسي تبقى في قواعد تخلي اللي يفكر يرشح نفسه رئيس جمهوريه يفكر الف مره انها مسئوليه كبيره و حيتحاسب عليها بعد 5 او 10 سنين بالكتير اوي ... وان في دستور و قوانين ومجالس نيابيه وراه و الخطوه بحساب ...
نفسي نقضي على البلطجه و نطهر كل العشوائيات
نفسي كل الناس تسكن في بيوت نضيفه وصحيه
نفسي كل الناس تتعلم صح و تتعالج صح و تقدر تربي اولادها كويس
نفسي في الحريه الكامله والديمقراطيه الحقيقيه علشان نثبت للعالم ان المتمسك بتعاليم دينه مش متطرف ... وان الملتزم مش ارهابي ... وان الطيب مش سلبي ... و المتسامح مش جبان ...
نفسي في اعلام امين وصحافه نزيهه
نفسي الازهر يرجع مقصد للطلاب من كل العالم
نفسي نخرج من المركزيه ... مركزيه القرار .. السلطه .. المركزيه الجغرافيه
نفسي نثق في قدراتنا و امكانياتنا واننا نستحق الافضل ونقدر نعمل احسن
نفسي نطهر نفوسنا قبل ما نحاسب غيرنا ...
نفسي نسمو باخلاقنا قبل ما نلعن الفساد ...
نفسي نعمل اللي علينا قبل ما ندور على اللي راح ...
نفسي نصبر و نتأكد انا طول ما نيتنا سليمه حنحصد الخير
نفسي نتأكد ان كل اللي سرقو و نهبوا اخرتهم سودا دنيا و اخره ... ونعلم اولادنا معنى الشرف و الضمير و الاخلاق
نفسي نخرج من القمم اللي عشنا فيه سنين و سنين ... نفتح عقولنا على معاني الحريه و الالتزام ... المساواه و العدل ... الكفاءه و الاجتهاد ...
نفسي في حاجات كتيييير ....
يا ترى نفسك في ايه ؟؟
__________________
من تواضع لله رفعه The ultimate car would be designed by Italians engineered by Germans built by Japanese &
|