[tom_gr]

واحد صاحبى من اشد الناس كرها لمبارك ( بس هو مش عارف يشرح ليه بيكرهه) كان عامل فيها زعيم وكل يوم بليل من اول يوم 25 نتقابل بليل ويحكلنا عن بطولاته فى المظاهرات وحرق كام عربية بوليس وولع قام قسم ومشى فى كام مظاهرة وكلام من ده
يعنى مصور نفسه احمد عرابى بتاع 2011
وانا كنت ضد التظاهر بالعنف والتخريب وكنت ضد ان مبارك ينطرد ولازم يستنى يمشى فى ميعاده ( علشان الى بيحصل دلوقتى من فوضى وكده
طبعا اللجان الشعبية كانت فرصة كبيره اوى يطلع فيها الغل الى جواه
المهم
حصل ادام عينى ان جاه جيش من البلطجيه اقسم بالله ماشفت فى حياتى اوحش من شكلهم والله المهم لقيت الشارع كله اتقلب فى ثانيه لجيش دفاع وكله اخد مواقعه

صاحبنا ده مافوتش الفرصة وفضل يدى تعليمات واوامر للاخوة الى زيه الى نفسهم يحاربوا
ومرة واحده الحاجز بتاع المرور الحديد ده وقع وعمل صوت مرعب اكنه قنبله

والله العظيم
الوحيد الى وطى وانبطح هو صاحبنا ده وكل الناس الى كانوا واقفين ماتوا من الضحك

المشكلة انى الوحيد من الشله بتاعتنا الى شفت المشهد ده ومش قادر احكيلهم علشان ما احرجهوش واعقده اكتر مهو متعقد