[AbOnOrA]

يا استاذ وليد بس بالراحة وبالمنطق اللى انت بتطالب بيه ايه علاقه ان ايران تشجع ولا امريكا تسقف باللى احنا بنطالب بيه ؟؟

ممكن حضرتك تتعب نفسك وتنزل يوم بس ميدان التحرير تشوف بنفسك الناس اللى بتدعى انها بتطالب بحريتك وكرامتك وتشوف بيقولو ايه وبيعملو ايه

لو نزلت هتشوف المسلم والمسيحى الاصولى والليبرالى والعلمانى واللى ملوش فى اى حاجة ولا عايز اى حاجة غير كرامته وحريته ومستقبل اولادة

لو نزلت بنفسك هتسمع هتاف الناس وهى بتقول لا دينيه ولا عسكريه عايزينها دوله مدنيه

تفتكر ايران عايزة دولة مدنيه فيها حريه ولا دولة كهنوتيه دينيه قمعيه زيهم ؟

لو نزلت بنفسك اليومين اللى فاتو بعد تصريحات خامنئى هتعرف قد ايه الناس كانت بتهتف ضدة

ومش ضدة بس لاء ضد اى حد من بره او من جوة يحاول يسرق الثورة ويغير مسارها

لو يهمك تكون ايجابى وليك دور انزل بنفسك وساعد على ان الثورة تفضل ماشيه فى اتجاهها الصحيح زى ما كل اللى نزلو قبلك بيعملو

ليه عايزين تحتكرو الذكاء والمفهومية والاخلاص والوطنيه

لعلمك يا استاذ وليد كلنا واعيين للمؤمرات الخارجية والاخطار اللى اكيد بتحاول تستغل الوضع ونفسنا انهارده قبل بكره الحال يتصلح ونرجع كلنا لحياتنا الطبيعية وافضل كمان

بس برضو علشان احنا مش عيال ولا بنهرج مش هنسلم الا لما تحقق مطالبنا ونسمع عملنا مش هانعمل

ومش هنغمى عنينا عن اساليب النظام البائد اللى لسه بتستخدم ضد كل واحد بيقول عايز حقى

من حقك تصدق كلام ووعود
ومن حقى (اشوف ) مقابل صوتنا وقتنا وفلوسنا وعرقنا ودمنا وارواح شهدائنا