[سيف الدين سعيد]

كلامك مظبوط يا دكتور كمال . والتجار والموزعين كمان مايعرفوش الكلام دا ولا حتى المواقع دى . وانا كنت الفتره اللى فاتت فى اسكندريه عند الأستاذ سايلنت . ولقيت موزع معتمد فاتح جديد فى سيدى بشر جنب فندق المحروسه وهو شغال لعربيات جاك وجيلى وانجلون . ولما اتكلمت مع صاحب المعرض عرفت منه انه مالوش اى اتصال بالنت ولا يعرف عن المواقع دى . وحتى طلب منى أسمائها . وفى وسط الحديث فهمت منه ان غلو السياره راجع الى قيمة عملتنا بالمقارنه مع العمله الدوليه . وان غلاء السيارات وخاصه المستورده منها بيرجع لسعر العمله . مش لكلامى فى المنتدى . ولا لشكرنا فى العربيه . وياريت يا رجاله بلاش نتكلم فى مواضيع قفلناها من زمان ونعيد فتح النقاشات مره تانيه .
وعلى فكره : كلنا حتى اللى اشترينا العربيه فى الرخص . زعلانين من غلائها . مش بسبب الكلام اللى بيتقال هنا فى المنتدى وانما لأننا عارفين ان مش فى صالح انتشار السياره غلو ثمنها فى الوقت الحاضر .
وكمان فى نقطه مهمه لازم حضراتكم تعرفوها ودا من واقع الشارع واللى بيشوفوا السياره معايا ويسألونى عليها . . وهى ان الناس لما بتشوف السياره وتسأل عن مواصفاتها وبعدين يعرفوا السعر الحالى لها بيقولوا انه سعر كويس مقارنة بغيرها . ودا مش رأيى وانما رأى 3 آراء أخرى التقيت بيهم أو هم التقوا بى فى اسكندريه فى أماكن مختلفه .
وشكرا للجميع .