المقالة ( 18 )
الـقـلة المـندسـة
الرئيس السادات رحمة الله عليه كان ليه تعـبـيـرات عجـيـبـة وشهـيـرة ......ولان الشعب المصرى شعب ابن نكتة حتى اصبح الآن للاسف شعب نكتة فـقـط بلا عمل واضح او منتج
فمسكو عليه التعبـيـرات دى وبقو يرددوها ومنها طبعا
انتفاضة الحرامية (قيلت فى احداث 18 / 19 يـنـايـر 1979 لما السكر غلى اعتـقـد قرشين والرز غلى 3 صاغ حاجة زى كده
ومن بـيـن كلمـاتـه الشهـيـرة
الوحدة الوطنيـة
والفـتـنـة الطائـفـية
والجملتين دول قيلو بعد احداث كنيسة الزاوية الحمراء بين المسلمين والاقباط سنة 1980
القلة المندسة / و دى جملة بـتـتـقـال لما يكونو عايزين يتـلككو لحد ويقبضو عليه وهذا الحد غالبا من الاخوان المسلمين بصفتهم شعبيتهم كبيرة شوية
انا مسكت الرؤوس / ودى قيلت فى احداث الكلية الفنية العسكرية
انا طردت الروس / قيلت فى عام 1972 بعد طرد الخبراء الروس من مصر
كـبـيـر العيلة
اخلاق القرية
وغيرها .......وغيرها من التعليقات
وكان يوم الجمعة يقعد جنب باب الجامع فاتـريـقـو عليه وقالو علشان يطلع اول واحد من الجامع ونفسى اعرف الشعب مقالش حاجة ليه على واحد صاحبنا مبـيـدخلش الجامع من اصله؟؟؟؟
ولازلت اتذكر السادات وهو بـيـقول كلمة القـلة المندسة وبـيـدوس على كل حرف فيها بما يوحى انه ناوى بعد تعذيـبـهم وسحلهم واطفاء السجاير فى بطنهم وتمزيق شعر الرأس بشلنين فضة (الشلن = 5 قروش ) الى اخر هذه الطرق الديموقراطية القديمة انه يرمى جثـثـهم تحت قطار البضاعة والذى لم يراه الكثير من ابناء الجيل الحالى وهو غالبا قطار محمل بالفوسفات او الفحم ويتكون من 60 او 70 عربة على الاقل ويسير بسرعة لاتزيد عن 20 كيلو فى الساعة
يعنى من الاخر بعد تعذيبهم هيقطعهم بالبطيـيـيـيـيـيـيـيـيـيـ يـيـيـيـىء
طيب ايه اللى جاب سيرة السادات دلوقت وتعـبـيـراته الظريـفـة ؟؟؟؟؟
بكل بساطة
بعد مظاهرات اليوم ولما عدد الناس المشاركين فى المظاهرات كبر والموضوع هيـبـتـدى يخرج عن سيطرة الشرطة
والشرطة عايزة تخلص....... مهو مش معقول هيـقـفـو طول النهار علشان شوية عيال جعانـيـن شحـاتـيـن مـنـغـلـقـيـن امبرياليـيـن الى آخر هذه التهم الجاهزة والمعلبة
ولذلك اصدرت وزارة الداخلية بـيـان عاجل
لان الناس الكتير دى معناها ان الشعب مش عاجبه الوضع والشعب لازم يعجبه الوضع
وازاى نبقى رجالة كده ونـتـكلم عن الوضع
وقالو فى البـيـان
ان فى قلة مندسة قامت بتحريض الناس ........... الى آخر هذا الهرش مخ
وطبعا ده معناه بداية التـلكيـك ...... علشان لما الداخليـة تخبـط فى الحلل والقـلل والفيـلل (جمع فيلا )
أسف .....الداخلية متقدرش تخبط فى الفيلل لانها ملك اولاد الناس أما اولاد الأيه اللى زينا فلازم
ياخدو على قـفـاهم وعلى بطنهم لان ملهومش ضهر
والملاحظ على البـيـان شىء عجـيـب
لما الاخوان شعبـيـتـهم كبيرة اوى كده ونجحو فى تجميع 10 الاف شخص فى ميدان التحرير وحده يعنى منطقة عابدين
مقدروش ياخدو ولا كرسى فى البرلمان بما فيـهـم منطقة عابدين ليـيـيـيه
حاجة من 2
يا أما وزير الداخلية بـيـشتـغـلنا وانا لا اعتـقـد ذلك لانه راجل مصلى وتـقـى ويعرف ربنا وميـكذبـش ابدا
او الانتخابات لاقدر الله اتزورت وانا لا اعتقد (على رأى عادل امام ) لان برضه الداخلية عندنا ناس طيبة ومتطلعش منها العيبة ابدا
الا اذا كان فيه قلة مندسة برضه زورت الانـتـخابات والداخلية ياولداه متعرفش
اومال الغلط فين (برنامج انقرض......... كانو بيدو الناس فيه 75 قرش لو عرفو الحل )
ازاى الناس دى وهما ملهومش اى شعـبـيـة ينـجـحو فى جمع الالاف فى ميدان التحرير؟؟؟؟
والعجـيـبـة بقى ان المجلس الموقر سيد قراره على رأى واحد صاحبنا (ربنا يجعل كلامنا خفيف )
عدد افراده 508 منهم 10 متعيـنـيـن يـبـقى فاضل 498 منـتـخبـيـن انـتخابات حرة نزيهة (دى غير خالتى نزيهة الله يرحمها )........ منهم 480 مرفوع عليهم طعون فى صحة فوزهم
يانهار اسكت (على رأى اسماعيل ياسين ) كل دووووول ناجحيـن بالتزوير او متهمين بالنجاح بالتـزوير
ان هـذه القـلـة المندسة هى السبب الدائم لجميع مشاكل هذا البلد الأمن
والحمد لله اننى لم اكن من هذه القـلـة المندسة او من الكـثـرة التى تظاهرت فى الشارع
(فلانامت أعين الجبناء / على رأى سيدنا خالد بن الوليد مش خالد انا )
وانا من هذا المنطـلق اقول
ياشعب مصر احترسو ومتخافوش
الداخلية قررت تـتـلكـك وتـقـلب عاليها واطيها لو الموضوع طول عن كده
اليوم برضه بـيـفرق كـتـير ياجماعة شوف المسروقات فى اليوم الواحد بتعمل كام مليار جنيه
ومـتـفـهموش ايه اللى هرشنى فى مخى وقررت اشوف قناة مصرية من يومين ولقيت واحدة شكلها حلو وشعرها اصفر ولون عيـنيـها مش عارفـه لانه كانت لابسة نضارة ونازلة رغى وزعلانة جدا على 2.7 مليار جنيه محدش لاقيهم
ليه ان شاء الله ؟؟؟؟؟
هو ربع جنيه مخروم وقع فى الشارع وانا جيت وقـفـت فوقه لحد م يمشى صاحبه واجيب بيه 5 ارغـفـة بعدها من ابو شلن
ولما سألت / مين دى ؟؟؟
قالو / لميس الحديدى
بقى بالذمة دى مش عارفـة راحو فين ؟؟؟؟؟ اذا كان انا من هنا وانا نايم تحت البطانية عارف مين اخدهم ؟؟؟؟؟وراحو فين ؟؟؟؟
شوفو البـجـاحة بتاعتى ؟؟؟؟
وفهمت ان ده فيلم هندى معمول علينا وقـرفت وحولت القناة وزعلت انى قررت اشوف التليفـزيون المصرى
حتى لما شفت قناة النيل للاخبار اليوم علشان اشوف بـيـقولو ايه عن اوضاع البلد عندنا لقـيتـهم بـيـتكلمو عن مظاهرات الناس واعتراضاتهم على الاحوال الاجتماعية والغلاء والبطالة
بس فى لبنان ..... مش عندنا
وكأن الدنيا عندنا ربـيـع والجو بديع ولازم نـقـفـل على كل المواضيع
ويااااا أيـتـهـا القـلـة المندسة ..........اتـلمو شوية وكشكشوها م تعرضوهاش