المشاركة الأصلية كتبت بواسطة mmffor
تفعيل الحملة (خليها تصدي و موديلها يعدي) اوحملة مقاطعة السيارات الجديدة لفترة مفتوحة! يأتي في ذهني قصه حقيقية! في انجلترا كان سعر كيلو السمك ب 3 جنيهات و كان السعر ده ثابت من فتره و مرضي للتاجر و المستهلك! فمرة تجار السمك اجتمعوا ( زي التجار اللي عندنا) و قالوا متيجوا نرفع سعر السمك شوية و اهو نعملنا قرشين حلوين في وقت قصير! ( اااااه هما قالوا كده بالحرف الواحد! انا كنت معاهم و بقولهم عيب ميصحش) المهم تفوا في بق بعض و تاني يوم الناس تصحى من النوم تروح تشتري سمك لاقوه بقى ب 4 جنيهات!!!! ليه ؟ من غير ليه ! بدون اي سبب ظاهر للمستهلك! يا جماعه الدنيا ربيع و الجو بديع و الخير كتير و السمك كتير امال زودتوا السعر ليه مفيش اجابة! بدون اتفاق كل اللي بقى يروح يشتري سمك يلاقيه غلي ياخد بعضه و يمشي من غير ما يشتري (و يحلف بينه و بين نفسه طب والله ما انا شاري ! اشربوه الهي تشربوا البحر كله)
اول يوم بعد رفع الاسعار مبعوش حتى بشلن!!! الله الله ! ايه اللي بيجرى يا ولاد!!! ريس الحرامية (التجار ) ولا يهمكوا هوا اول يوم بس ! بكره حييجوا و رجليهم فوق رقابيهم و ساعتها نبيعلهم ب 5 جنيه كمان مش 4 بس و ان كان عاجبهم! تاني يوم لاقوا مفيش حد بيسأل حتى ولا معبرهم!!! تالت يوم !
رابع يوم! ولا قرش دخل جيوبهم الجشعة! ايييه يا زعيم ! العمل ايييييه! قالهم العمل عمل ربنا! (افتكروا ربنا ساعتها بس!!! ) امركوا لله نزلوا السعر, السعر رجع تاني 3 جنيه! مفيش حد برضه راضي ياكل سمك!!!! يا خبر اسود و مهبب!!!! عملوا دعاية و لفوا بميكروفونات! قرب يا عم قرب يا جدع السمك رخع للاسعار القديمة تاني علشان خاطر عيونكوا انتوا بس! علشان بنحبكوا و عارفين انكوا مننا و علينا مرضيناش نحرمكوا من السمك اللي بتحبوه! اليك يا عزيزي العميل لان مصلحتك من مصلحتنا و رضاك هو اكبر همنا لانك في ايدين امينة! السمك بتلاته جديدة لفترة محدوده و بأسعار زمان! هس هس مفيش ولا زبون و السمك ابتدت ريحته تفوح من كتر ما صدا! قصدي من كتر الركنه و ابتدى يعفن!!
المهم بعتوا واحد : قربي يا مدام قرب يا استاذ كيلو السمك ب 2 جنيه!!!! مفيش......
طب قرب والحق العرض! تصفيات الموسم السمك بجنيه (مفيش حد ريقه جري و راح جاااري يشتري و نسي ان اللي حيشتري منه ده و ينفعه كان لسه مديله على قفاه من كام يوم!!! ) السمك بنص جنيه برضه مفيش و بعد مرور شهر كان كل صيد السمك مرمي في البحر بعد ما باظ و التجار باعوا اللي وراهم و اللي قدامهم و اجتمعوا بعمدة المدينه اللي عمل اجتماع مع مجلس المدينة و باقصى قدر من الشفافيه رئيس التجار اعترف بغلطته و ابدى ندمه و اعطى تعهد ان سعر السمك عمره ما حيزيد عن 3 جنيه استيرليني و من ساعتها لحد يومنا هذا كل حاجة بتغلى اللا السمك في انجلترا لسه ب 3 جنيه!!
|
ايه الحاجات اللذيذة دي بس للأسف ريحة السمك طلعت هههههههههههههههه
ياباشا فكرتك في البال وياريت بدماغك كده تفكرلنا ازاي نعمل الحملة دي وننشرها