بالظبط زى ماقال احمد انور
المعيار دلوقتى فى حماية الراكب فى المقصورة (الامام والخلف) ودلوقتى كمان للمشاة علشان تاثير الصدمة بتاعة العربية (لوخبطت حد لاقدر الله) يكون قليل بقدر المستطاع
كمان من ضمن الوسائل اللى بتستخدم فى كده تصميم جسم العربية بشكل يحتوى على اجزاء تسمى (نقاط الانهيار الذاتى) وديه بتخلى الصاج يتقطم عند ضغط معين فيمتص جزء من الصدمة بدل ما ينقلها للجزء اللى بعدة وبالتالى توصل للكابينة
جزئية تانية مهمة جداً ان زمان كانت كل العربيات مزودة باكصدامات صلب وديه كان ليها دور كبير فى تحمل الصدمات لكن دلوقتى اكصدمات العربية والصدر كمان بيبقى فيبر وبيحطوا وراه مواد شبيهه بالسفنج علشان تمتص الصدمة اكتر لكن طبعاً تاثير الصدمة بيبقى اكبر
تخيل مجازا ان واحد بتجرى وشايل على صدره كارتونة فيها سنفج وخبط فى الحيطة (لزق)
وواحد تانى شايل كرتونة فيها طوب وخبط نفس الخبطة مين هيتأثر اكتر
ديه ببساطة نفس الفكرة زى ما قال احمد امتصاص الصدمة حفاظاً على المقصورة هو الاولوية دلوقتى
لكن من ناحية تانية برضو خامات التصنيع والانتاج التجارى الواسع (بعد طفرة الصناعات الاسيوية ) ساهموا فى تقليل الاجزاء الاكثر متانة فى العربية (الدعامات والكمارات) خاصة ان الاجزاء ديه لما بتقل العربية بتبقى اخف وبالتالى سحبها وسرعتها بتبقى اكبر واستهلاكها للبنزين بيبقى اقل
فاكثر من عامل ادى للحال ده لكن فى المقابل الاهتمام بقى اكثر فعالية بحماية المقصورة وانت هتلاحظ ان العربيات الحديثة بتتعجن اه بس مقصورة الركاب بتبقى سليمة الى حد كبير
وربنا يكفينا جميعا شر الطريق