النوبيرا و الي عملته فيا
النوبيرا
هاحكيلكم على الي حصل
كان معانا الادا الكريمه و طبعا لازم تتغير كان الكلام ده في 2001
التويوتا الكورولا ضيقه و 1300 سي سي و ب 85 الف جنيه ده كان اياميها
قلت للحج لا النويرا 1600 اوتوماتك و واوسع و ب 63 الف جنيه
كانت شووووووووووووره مهببه
المهم جبناها و تمت التجربه
التسارع ماشاء الله لحد ال 120 بعد ال 120 بتنام بس الحج مره قالي انه و لله الحمد وصل لل180
الثبات بدون مبالغه زي الاوبل فيكترا
الفرامل ضايعه
الصالون واسع و بنركب فيه 6
الشنط ضيقه للغايه و يا دوب شنطه سفر كبيره مع شويه اكياس
استهلاك البنزين خرابه بيوت الصفيحه كانت 170 كيلو على الطريق
اكتر حاجه كانت غايظاني بجد التكييف يشتغل ربع ساعه زي القرد بعد كده يطلع ريحه
كلام التوكيل اصل التكييف بيطلع تلج على السربنتينه د
المهم العربيه زي الفل لحد 10000 كيلو
و مره واحد صوت تزييق زيييييييييييييييييييييييي ييييي
خير يا سيدي لا ده تيل فرامل ركب يا عم 120 جنيه و الله زي الفل
و عند ال20 الف كيلو نفس صوت التزييق مع تخبيط عفشه ايه ده لا تيل فرامل و بيض مقصات
بكام 120 تيل و 70 جلب و بيض
ركب يا عم و نفس الدوكه بقيت صاحب كل الميكانيكيه و العفشجيه الله يخرب بيت كده
فضلت على المنوال ده لحد اما جت الحظه الحاسمه و بعت العربيه
بصراحه ربنا العربيه كسبتني 10000 جنيه عما جبتها دي الميزة الوحيده الي فيها لان في الفتره دي العربيات سعرها غلى ووصلت زيرو ل 90 الف جنيه بعتها في 2003
و بعتها ماشيه 50 الف كيلو
مميزات العربيه تسارع و ثبات مالوش حل شكل العربيه جميل و شيك الى حد ما من جوة
عيوبها التكييف و الفرامل و انك لازم ايدك في بقها علشان ماتتبهدلش منك و طبعا مافيش الكلام ده عندي
|