[dr_eslam_66]

نيسان صني مو 2010 إي إكس أوتوماتيك فول أوبشن أي بي إس.

• العربية تقيلة على الأرض بسبب الوزن, في الملفات راسية لأني عفشتها كإنها معمولة لمصر.
• 130 إزاي إذا كانت رايح جاي على طريق مصر إسكندرية أربع مرات في نفس الإسبوع وكانت لسة تحت الـ 1000 كم ومعاك سرعة زي ماتحب وغرز كمان (أنالغاية 180 وماكملتش بس كان الآر بي إم لسة على 5000 ياعني لسة فيها).
• سحب وحش إزاي جرب الأوفر درايف بتاعها بيجنن العربية جرب وشوف.
• فتيس يستجيب وأعطاله منعدمة, وآه بيعض على فكرة وإنتا بتنقل من P لـ أي حاجة تانية لو ماكنتش شادد الهاند بريك الأول وبالأخص لو راكن على مطلع أو منزل.
• تكييف تلاجة وأنا من النوع إلي لا يمكن يركب عربية تكييفها متوسط حتى.
• إرتفاع عن الأرض مثالي لا عمرها هتحك منك ولا في نفس الوقت مرفوع لفوق شبه الشاهين.
• إستهلاك فوق المتوسط بس مش عالي خد بالك إنتا بتتكلم في عربية 118 حصان وزنها 1 طن فتيس أوتوماتك (بس ماحسبتش إستهلاك البنزين كام بالظبط بس فعلا أكتر من المتوسط).
• لو ربنا وسع عليك وجيبت السوبر صالون هتعرف ياعني غيه معنى عربية فارهة بـ 100,000 بس.
• المساحة المخصصة للأرجل في الكنبة الخلفية مش مريحة للراكب الخلفي إذا كان طويل.
• الماتور مع إنه حصانه كبير العربية تقيلة في الوزن فا بتديلك طلعة مش رياضية (لو إنتا معاك مانيوال مش هتحس بدا إطلاقا, ولو إنتا قلبك جامد شغل الأوتوماتك مانيوال وإطلع على واحد وبعدين إتنين وهاكذا بس إنتا المسؤول)
• بالنسبة لموضوع العزل الي لقيت ناس بتتكلم عليه كتير بقى أنا ماسمعتش صوت جوا العربية غير وأنا فوق ال 160. ياعني أساسا الأدرنالين كان مبهدلني ويمكن تكون تهيآت شد عصبي بس, الماتور صوته عالي بعد ال 100 او 120 وقبل كدة طبيعي جدا لدرجة إني ماكنتش بميز من الصوت العربية دايرة ولا واقفة.
• أنا لو قعدت أتكلم من هنا لبكرة مش هخلص هجيبلك من الآخر لو لقيت عربية في السوق بمواصفاتها وسعرها مش هقولك أقل إشتريها فورا وماتترددش.
• الصني هيا الصفقة الرابحة في السوق المصري.