رد: كل ما تود معرفته عن انواع الفرامل
شكرا يا باشا على المعلومات بس احب ازود كلمتين على ABS , ESP
ِABS هى Anti-lock braking System يعنى ايه ؟؟؟
يعنى نظام الفرامل المانع للإنغلاق.... طيب يعنى ايه برده ؟؟؟
يعنى النظام ده مابيخليش تيل الفرامل يقفل على الديسكات لدرجة انه يوقف العجل خالص و العربية تزحف ..و اللى بيخليها تزحف ان العجل يكون واقف و العربية لسة فيها طاقة حركة فا تزحف العربية و طبعا التحكم فيها بيبقى صفر فى الحالة دى ...
فا نظام الفرامل المانعة للإنغلاق بيقفل على الديسكات و يفتح تانى و بعدين يقفل و يفتح تانى بصورة سريعة جدا على هيئة نبضات و بالطريقة دى عمر العجل ما هيقف نهائى الا لما العربية كلها تقف ....و بالطريقة دى العربية عمرها ما هتزحف عند الفرملة و هيكون التحكم فيها احسن بكتير جدا أثناء الضغط على الفرامل
ESP هو Electronic Stability Program يعنى نظام الثبات الإلكترونى و بيتغير اسمه على حسب الشركة المصنعة يعنى الاسم ده ESP أول من طبقه كان الوحش الألمانى مرسيدس طبعا
طيب و ده بيعمل ايه بقى او بيشتغل ازاى ... هو عموما بيبقى عبارة عن عدة أنظمة مشتركة بس هو عموما ببساطة نظام بيشوف حالة العربية ايه من حيث الثبات و بيظبط الاوضاع عن طريق الخطوات التالية
1- بياخد قراءة من الاربع عجلات بتوع العربية كل 1/10 من الثانية يعنى عشر مرات فى الثانية كمبيوتر النظام بيعرف سرعة اللف بتاعت كل عجلة و زاوية الدوران بتاعت العجل الأمامى
2- طول ما الدنيا تمام و العجل بيلف بنفس السرعة أو بسرعات متناسبة مع زوايا دوران العربية النظام مابيعملش اى حاجة بيفضل يقرأ و خلاص
3- أول ما النظام يجيله ان فيه عجلة سرعة لفها مش مظبوطة بما يتناسب مع باقى العجل زى مثلا فى حالة المطر او الثلوج أو وجود رمال أو زيوت بالطريق بيبدا النظام فورا بعمل حساباته فى أجزاء من الثانية و يفرمل عجلة أو أكتر أو يفصل الباور عن عجلة أو أكتر أو حتى يغير نسبة الباور اللى واصلة للعجلة و خصوصا فى عربيات الدفع الرباعى .. حتى ترجع السيارة إلى حالة التماسك على الطريق و بعدين يرجع يقرأ تانى .. و هكذا و من الانظمة المساعدة لنظام الثبات الإلكترونى ABS و نظام Traction Control
و صباحكم زى الفل
__________________
......................... ..
يا ترى جاهزين لتجربة السواقة اللى جاية ؟؟؟؟؟!!!!!!!
|